LAOAG CITY NAKAGUN-OD ITI KANGATUAN A MARKA TI COA AUDIT KALPASAN ITI 10 A TAWEN

June 5, 2022 Headlines

SIUDAD ITI LAOAG – Naragsakan dagiti opisiales ken empleado ti gobierno iti Siudad ti Laoag idi Mierkoles, Mayo 31, kalpasan nga imbaga iti Commission on Audit (COA) iti Region 1 iti maysa nga unmodified opinion panggep iti kalentegan ti presentasion ti financial statements daytoy manipud ngudo ti tawen Disiembre 31, 2021.
“This recognition will serve as an inspiration for us to continually serve the public with integrity, transparency, and efficiency in our office operations (daytoy a panangbigbig ket agserbi kas maysa nga inspirasion para kadakami tapno agtultuloy a pagserbian iti umili nga addaan integridad, kinasin-aw, ken kinaepisiente dagiti operasion ti opisinami,” kuna ni city accountant Loelyn Acain iti maysa nga interbiu.
Iti unmodified audit opinion ket kangatuan panangklase (rating) a maited iti maysa a local government unit, a mangsaklaw kadagiti napateg nga accounts ken operation.
Panggep daytoy a maammuan iti kinaumiso ti financial records ken reports a maitunos kadagiti probision iti Philippine Public Sector Accounting Standards (PPSAS).
Imbaga ni Acain nga iti kangatuan a rating ti COA para kadagiti financial record ti gobierno ti siudad kalpasan iti maysa a dekada ket paregtaenna iti ad-adu pay nga agpuonan iti siudad bayat a maipasigurado kadagiti umili nga ipamuspusan ti lokal a gobierno tapno masigurado nga amin a transaksion ket masapul a mayannurot kadagiti pagannurotan nga intuding dagiti autoridad.
Kalpasan a maital-o ni Acain kas city accountant idi Hulio 2021, imbagana a nangitudingda iti kalat ken rinepasoda dagiti napalabas nga audit reports ken naduktalan tapno mataming dagiti pakaseknan.
Mangnamnama daytoy nga itultuloy ti grupona nga igaedda iti agtrabaho tapno pagtalinaeden iti kangatuan a rating ti COA.
Imbaga ni acting budget officer Nelda Casas a sigud a baybayadan ti gobierno ti siudad iti bangko iti PhP14milion kada tallo a bulan gapu iti outstanding loan balance para iti konstruksion iti PhP348 million a Laoag City General Hospital ken pananggatang iti aggatad PhP100-million nga hospital equipment iti panawen ni dati a mayor Chevylle Fariñas.
Epektibo daytoy Hunio, iti gobierno ti siudad nga idangdanguluan ni nabotosan manen a Mayor Michael Keon ket nawayaanen iti outstanding loan balance daytoy, kayat na a saw-en ket awanen ti utang iti siudad.
Kabayatanna, imbaga ni Keon nga iti kaawan iti utang ket maysa laeng kadagiti nasayaat a pasamak iti tengnga ti pandemia iti coronavirus.
“The city of Laoag is in a better position now that we are cleared from debts(iti Siudad ti Laoag ket adda iti nasaysayaat a kasasaad itan nga awanen iti utangna),” kunana.
(LA-PNA Ilocos/PMCJr.-ABN)