MANNALON TI ILOCOS NAKAAWAT TI HYBRID SEEDS PARA MATUTUDO

June 14, 2024 Headlines

SIUDAD TI LAOAG

Inrugin ti Department of Agriculture (DA) idi Huebes iti opisial a pannakairuar kadagiti hybrid rice seeds a manamnama a mangpadur-as iti apit dagiti mannalon ti Ilocos Norte agingga 15 porsiento wenno innem a tonelada kada ektaria iti panawen ti nepnep. Iti maysa nga interbiu kenni Engineer Erickson Biag, municipal agriculturist ti
Currimao, kinunana nga agarup 159 mannalon manipud ili ti Currimao iti nakaawat ti bingayda bayat ti pannakaiwaras iti bukbukel sadiay covered courts ti Cabuusan, Maglaoi Centro, Maglaoi Sur ken Maglaoi Norte.

Imbagana nga agdagup iti 850 mannalon ti pagay manipud iti munisipalidad ket naikeddeng nga umawat manipud iti DA Regional Field Office 1 hybrid seeds agingga Hunio 19. Kaudian a datos manipud iti Philippine Rice Research
Institute (IRRI) naipakita nga nagun-od ti Ilocos Norte iti rice production output a 338,681 metriko tonelada idi 2023, nga addaan 65,069 ektaria ti lugar a nagapasan ken apit nga 5.18 metriko tonelada kada ektaria. Kasta met, ipakita ti datos ti Philippine Statistics Authority (PSA) nga ti kontibusion ti probinsia ket 16.83 porsiento iti dagup a produksion ti bagas iti Rehion 1.

“Agyamankami unay iti nakaro a suporta ti gobierno kadakami a mannalon. Dakkel daytoy a tulong nangruna ta
ngumatngato ti presio dagiti maaramat iti talon ken kumarkaro nga epekto ti panagbalbaliw ti klima,” kinuna ni Rainy Valente, maysa a mannalon ti pagay manipud Barangay Comcomloong iti maysa nga interbiu. Babaen iti national rice program ti DA, maipaayan dagiti mannalon iti high-quality seeds a maitutop kadagiti lugarda inton agangay ti panagtutudo. Naibatay iti report ti DA Regional Field Office 1, adda dagup 355,742 mannalon ti pagay iti rehion iti sidong ti Registry System for Basic Sector in Agriculture.

Dagitoy a mannalon ket kualipikado a makaawat iti tulong manipud DA ita a tawen, nga addaan dagup ti PhP2.9
billion a badyet para iti rice program iti Rehion 1. “Iti dagup a gatad, 88 porsiento wenno agarup PhP2.6 billion iti napalubosan para iti production support services,” kuna ni Leah Coloma, senior agriculturist ken focal person para iti rice program. Malaksid ti madama a pannakaiwaras kadagiti hybrid seeds, makaawat met dagiti maikari a mannalon kadagiti inorganic fertilizer, soil ameliorants ken bio fertilizer.

(LA-PNA Ilocos/PMCJr.-ABN)