MECQ napawayway iti 2 nga ili ti Ilocos Sur agingga Hulio 19, 1 pay naipasidong ti MECQ

July 10, 2021 Headlines

ILOCOS SUR – Iti modified enhanced community quarantine (MECQ) nga kasasaad iti ili ti Burgos ken Narvacan ket agtalinaed agingga Hulio 19.
Inyanunsio ni Governor Ryan Luis Singson babaen iti Executive Order No. 63 iti panangpawayway iti pannakaipatungpal ti MECQ kadagitoy a munisipalidad gapu iti rekomendasion dagiti COVID-19 Task Force ti ili.
Idi Mayo 30 nga impasidong ti gobierno ti probinsia ti Ilocos Sur dagitoy nga ili iti MECQ manipud Hunio 5 agingga 19 ken kalpasanna napawayway agingga Hulio 4.
Agingga Hulio 6, iti pangta ti COVID-19 iti probinsia ket agtaltalinaed nga nakangatngato ken makapadanag gapu ta adda itan iti 3,558 positive cases nga nairekord nga 771 ditoy ket aktibo a kaskaso nga addaan extensive contacts; nga 12 ditoy ket aktibo a kaskaso nga manipud Burgos ken 70 nga aktibo a kaskaso ket manipud Narvacan.
“Due to the still increasing number of new cases and sustained community transmission in some barangays of these municipalities, the medical team of Ilocos Sur also sees the need to extend anew the MECQ in order to contain the virus,” kuna ni Governor Singson.
Dagiti sabali pay nga ili ti probinsia nga naipasidong iti MECQ ket Sinait ken Sta. Lucia (agingga Hulio 12), Magsingal (agingga Hulio 15), ken Banayoyo ken Lidlidda (agingga Hulio 18).
Sadiay ili ti Salcedo, improklamar ni Mayor Leopoldo Gironella Jr. iti Executive Order No. 24 nga mangipasidong kadagiti barangay ti Lucbuban, Poblacion Sur, Dinaratan, Kaliwakiw ken Culiong iti MECQ manipud Hulio 6 agingga 20 gapu iti panagngato ti kaskaso ti COVID-19.
Kinuna ni Mayor Gironella nga kalpasan iti panakigimongna iti Local Inter-Agnecy Task Force on Emerging Infectious Diseases ken kadagiti barangay captain iti lima nga barangay, nairekomenda nga ipasidongda iti MECQ a kasasaad tapno malapdan iti panagwaras iti virus ken maaddaan iti naing-inget a quarantine restrictions.
Kabayatanna, binalakadan ti Provincial Tourism Office dagiti amin nga agbiahe iti probinsia ti Ilocos Sur nga mangala iti travel requirements sakbay nga sumrek iti border checkpoints tapno maliklikan ti aniaman a pakadukotan ken pannataktak. Karaman kadagiti requirements iti identification card wenno aniaman a government issued ID; agaplly para iti travel pass iti Tara Na! (https://ilocossur.tarana.ph/); Department of Tourism accredited accommodation weno travel agency booking confirmation; negative RT PCR test nu aggapo iti ECQ, MECQ ken GCQ a lugar nga naisyu iti uneg ti 72 oras sakbay nga agbiahe; ken RTPCR test nga naisyu unrg ti 72 iras sakbay nga agbiahe wenno antigen test nga naaramid 24 oras apaman a sumrek nu aggapo manipud lugar ti MGCQ.