‘No Parking, No Car’, epektibo kaya?

November 3, 2018 Balitaktakan sa Amianan Opinion

Magandang hakbang ang Senate Bill No. 201 o ang Proof-of-Parking Act at Bill No. 1165 o ang ‘No Garage, No Car Act of 2016’ kung maipasa bilang batas upang tugunan ang malala at lumalala pang sitwasyon ng trapiko sa Pilipinas. Tuloy-tuloy ang dumaragdag na bilang ng sasakyan sa mga kalye na may 370,000 bagong sasakyan na dumagdag sa may 10 milyong saksakyan, ayon sa ulat ng Chamber of Automotive Manufacturers of the Philippines Inc. (CAMPI). Plano ng batas na ito na ibsan ang mga kalye na hinaharangan ng mga iresponsableng may-ari ng mga sasakyan na ginagawang animo sarili nilang paradahan ang mga kalye at sidewalks (ano na ba ang nangyari sa Anti-Road Obstruction Law?).
Sa ilalim ng batas, ang ‘proof-of-parking space o facility’ ay isang rikisito bago makabili ng sasakyan at marehistro ito sa Land Transportation Office. Ibig sabihin nito ay sinumang may nais bumili ng sasakyan ay dapat munang magprisinta ng katibayan na mayroon silang ‘permanenteng paradahan o pasilidad’ upang igarahe ito. Ang lugar ay dapat nirerentahan o binili ng may-ari ng sasakyan at kailangan niyang iprisinta ang notaryadong sertipiko sa Land Transportation Office bilang isang rikisito sa rehistrasyon. Aplikado ito sa lahat ng naninirahan o may business address sa ‘metropolitan areas’ gaya ng ngunit hindi limitado sa Metro Manila, Angeles, Bacolod, Baguio, Batangas, Cagayan de Oro, Cebu, Dagupan, Davao, Iloilo, Naga at Olongapo.
Awtorisado ng batas na ito ang LTO, MMDA at LGU na magsagawa ng periodic ocular inspections sa mga iskinita at mga kalye at tanggalin ang mga illegal na nakaparadang sasakyan.
Subalit kailangan yatang mas pag-aralan muna nang mabuti ang panukalang batas na ito dahil baka pagsimulan ito ng mga panibagong problema na sa kabila ng kailangang notaryado ang dokumento ay maaaring pagmulan ito ng iba pang uri ng korapsiyon. Sa ugali ng ilang tao na magaling mameke ng mga dokumento ay baka pagsamantalahan lang ito. Isa pang tanong dito ay paano na ang mga rehistrado ng sasakyan, hindi ba sila sisitahin? Paano na kung i-renew na nila ang rehistrasyon ng kanila sasakyan?
Masisiguro ba natin ang kahusayan ng implementasyon nito na maaaring posible ito sa ibang lugar subalit maaari namang baka lalong maging isyu sa ibang lugar?
Natural masasaktan dito ang mga may negosyo sa sasakyan at tiyak gagawa rin sila ng mga hakbang upang maprotektahan ang industriya ng sasakyan. Bagama’t umaani ng kasiguruhang maipasa ang panukalang batas sa Senado ay may pagkakataon pang tingnan ito muli at pag-aralan…kung kaya pa.