P29/KILO BAGONG BAYANING MAGSASAKA A BAGAS ADDAN ITI ILOCOS NORTE

May 10, 2025 Headlines

SIUDAD TI LAOAG, Ilocos Norte

Impadamag ti National Irrigation Administration (NIA) ti naballigi a pannakairuar ti Bagong Bayaning Magsasaka rice program idiay Ilocos Norte, a ti maysa a kilo ti bagas ket nailako iti 29 pesos. Manipud idi nairugi idi Setiembre 13, 2024, natulonganen ti programa iti
agarup 1,5000 a mannalon babaen ti kontrata ti NIA ken uppat nga asosasion dagiti irigador iti probinsia. Agdagup iti 901 nga ektaria ti namulaan ti bagas iti sidong daytoy a proyekto. Agingga ita, 53,582 a 10- kilo a bag ti BBM rice ti nailako. Mailako ti bagas iti tunggal Biernes iti NIA Compound idiay San Nicolas, Ilocos Norte, babaen ti outlet ti Kadiwa ng Pangulo.

Segun kenni Mark Niel A. Recaido, senior irrigators development officer ti NIA Ilocos Norte, makikaduada met iti bi-monthly Kadiwa ng Pangulo events nga idauluan ti probinsial a gobierno ti Ilocos Norte (PGIN). “Agingga ita, addaankami iti natalged a suplay ti BBM rice, dayta ti gapuna a nakikaduakami iti Kadiwa ng Pangulo iti kapitolio ti probinsia. Napaliiwmi a ti panangsuporta ti publiko iti panaggatang kadagiti tagilako ditoy ket naipasdek itan a naimbag. Iti napalabas a Kadiwa idi Abril 25, nangiyegkami iti 498 a sako ti bagas a mailako.”
kinunana. Tapno makagatang iti subsidized rice, masapul nga ipakita dagiti gumatang iti balido nga ID a mangpaneknek a karamanda kadagiti vulnerable a sektor, kas kadagiti senior citizen, persons with disabilities (PWDs), solo parents, ken 4Ps beneficiaries.

Dagiti saan a kameng kadagitoy a grupo ket magatangda pay latta iti bagas ti Irrigators Associations (IAs) iti PhP35 kada kilo. Malaksid iti
panangitukonna iti nalaka a bagas, kinuna ni Recaido a ti programa ket isagana met dagiti lokal a mannalon a mangimaton ti bukodda a marketing operations ti masanguanan. Ngem iti agdama, tapno mapalag-an ti pannakaipatungpal, tultulongantayo ti asosasion dagiti irigador iti dasig ti panaglako,” innayonna. “Dayoy nga aktibidad ket maysa a panangisagana kadagiti mannalon ti asosasion dagiti irigadortayo tapno inton agangay ket mangbukel ti grupoda iti maysa a kooperatiba. Iti kasta, isudanto ti mangasikaso iti panaglako kadagitoy a produkto iti masakbayan.

Estoria dagiti benepisario

Ni Enrique Dumalig, maysa a 86-anyos a senior citizen ket nangibinglay ti panangyamanna iti programa bayat ti Abril 25 a Kadiwa ng
Pangulo a pasamak a kinuna, “Kayatko ti agyaman kenni Presidente Bongbong Marcos ken ti NIA iti pannakakitada kadagiti pannakidangadangmi a gumatang iti nangina a bagas isu nga intedda kadakami daytoy a programa tapno nasaysayaat ti pannakagun-od
ti taraon.” Kabayatanna, namnamaen ni Kimberly Madriaga, anak ti maysa a solo parent, nga itultuloy ti NIA ti programa. Namnamaek nga ituloy ti gobierno daytoy a programa gapu ta narigat ti gumatang kadagiti kasapulan ita nga aldaw nga addaan iti nangato a presio
dagiti tagilako,” kinunana. Inapresiar met ni Jasper Dela Cruz, anak ti maysa a senior citizen ti pagnam-ayan ti panaggatang ti BBM rice
manipud kadagiti pasamak ti Kadiwa.

Sipud pay idi nangrugi daytoy a Kadiwa a mangitukon iti BBM rice, ditoy ti pakaalaanmi iti suplaymi. Gatangenmi laeng iti umdas a bagas a kasapulanmi agingga iti sumaruno nga iskediul ti Kadiwa, isu nga agtultuloy nga agpannuraykami iti dayta para iti bagasmi,” kinunana.
Tapno matainayon ti kalidad iti nababbaba a presio, kanayon ti panangsukimat ti NIA kadagiti lugar ti produksion ken mangipatungpal kadagit nainget a quality control, a mangipasigurado nga agtalinaed a nalaka ti bagas ngem nangato ti kalidadna. Pinaregta met ni Recaido ti suporta ti publiko para kadagiti lokal a mannalon. Iparegtak ti amin a mangsuporta kadagiti produkto dahiti lokal a mannalontayo gapu ta isuda ti nagtrabaho a sipipinget para iti dayta,” kinunana.

Ti BBM rice program ket maysa a kangrunaan a paset ti estratehia ti seguridad ti taraon ni Presidente Ferdinand Marcos Jr., a panggepna a pababaen ti gastos ti produksion ti bagas iti baba ti PhP15 tunggal kilo ken siguraduen a dagiti pamilia a Filipino ket makaala ti nalaka a
bagas. Babaen ti panangidaulo ti NIA ken suporta manipud kadagiti mannalon, agtultuloy ti inisiatiba ti BBM rice a mangipasdek iti dalan nga agturong iti ad-adda a self-reliant a sektor ti agrikultura ken nasaysayaat a pannakagun-od iti taraon para kadagiti sangkabbalayan ti Ilocano.

(EJFG/SMGA, PIA Ilocos Norte/ PMCJr.-ABN)