P4.8B iti agrikultura ti Region1 dinadael ni ‘Ompong’

SIUDAD TI SAN FERNANDO, LA UNION – Nagdeklara iti state of calamity dagiti probinsia ti La Union ken Ilocos Norte; siudad ti Vigan iti Ilocos Sur; ken ili ti San Fabian iti Pangasinan bayat a nasurok P4.8 billion ti inisyal a pakabuklan ti nadadael iti agrikultura iti Region 1 gapu iti bagyo nga Ompong.
Iti La Union, indeklara ti Sangguniang Panlalawigan babaen ti Resolution No. 568-2018 kabayatan ti 116th session idi Setiembre 18 ti state of calamity.
Numanpay inreport ti probinsia ti zero casualty kabayatan ti bagyo, dagiti nadadael iti agrikultura, pakairamanan ti livestock ken poultry, ket P934,916,142.50 bayat a dagiti nadadael nga imprastraktura ket P982,998,741.66.
Adda 29,824 pamilia wenno 111,947 a tattao ti naapektaran ti bagyo.
Immunan a nagdeklara ti state of calamity dagiti ili ti Luna ken Bangar gapu iti epekto ti bagyo Ompong malaksid iti San Gabriel ken Naguilian nga adda latta iti state of calamity gapu iti habagat idi napalabas a bulan.
Gapu kadagiti nakuna a declaration, mausar ti probisial a gobierno ti La Union ti emergency fund a para iti relief assistance kadagiti apektado nga umili ti probinsia.
Malaksid ditoy, mausar dagiti residente a kameng ti Pag-IBIG Fund ken Government Service Insurance System (GSIS) ti calamity loan ken emergency loan a makatulong tapno makaungarda manipud iti didigra ti bagyo.
Iti Ilocos Norte, naideklara ti state of calamity babaen ti Resolution No. 2018-49-265 idi September 17 kalpasan a ngimmato iti P3.2billion ti naireport a nadadael iti agrikultura ken imprastraktura iti probinsia.
Iti agrikultura, immabot iti P1.9 billion ti balor dagiti nadadael, P1,782,104,706.95 ditoy ket kapagayan. Agarup 9,000 ektaria a kataltalonan ti totally damaged ken 39,229.7 ti partially damaged. Adda P20,000 ti nadadael iti benneg ti fisheries.
Adda pakabuklan a P1,378,340,000 a nadadael iti imprastraktura a pakairamanan ti P745,320,000 iti flood and river control structures; provincial roads – P262,800,000; ken P101,700,000 iti national roads.
Immuna ditoy, inreport ni Gov. Imee R. Marcos ti “zero-casualty” iti Ilocos Norte.
Malaksid ditoy, segun kenni Education (DepEd) Secretary Leonor M. Briones, 110 a pagadalan ti nadadael iti Ilocos Norte, 80 kadagitoy ti nalayus. Mapapattapatta nga agbalor ti P117 million dagiti nadadael.
Iti Ilocos Sur, nagdeklara ti state of calamity ti siudad ti Vigan bayat a nasurok P1billion ti nadadael iti agrikultura ti probinsia gapu kenni Ompong.
Immunan a naideklara ti state of calamity iti buo a probinsia ti Ilocos Sur idi napalabas a bulan gapu iti habagat.
Mapapati a malaksid iti nadadael iti agrikultura, dakkel a karit iti turismo ti pannakadadael dagiti heritage houses iti Vigan.
Kabayatanna, numanpay maysa laeng nga ili ti nagdeklara ti state of calamity iti Pangasinan, segun iti inisyal a report ti probinsia, dumanon iti nasurok P1billion ti nadadael iti agrikultura ken imprastraktura.
Iti report ti Provincial Engineering Office (PEO) ken Provincial Agriculture Office (PAO) iti Provincial Disaster Risk Reduction and Management Office (PDRRMO) idi Setiembre 19, mapattapatta ti gatad dagiti nadadael iti imprastraktura nga P47,819,000, pakairamanan dagiti nadadael nga provincial roads, rangtay, provincial buildings ken dadduma pay a pasdek.
Iti agrikultura, ti partial damages ket dumanon iti P1,043,361,280 a pakaibilangan dagiti kapagayan, pagmulaan kadagiti natnateng ken iti benneg ti fisheries.
Naapektaran ti bagyo nga Ompong ti 56,104 pamilya wenno 224,684 a tao manipud iti 351 barangay iti 36 nga il-ili ti probinsia.
Iti partial report ti Provincial Social Welfare and Development Office, 20 kabalbalayan ti totally damaged, bayat a 399 ti partially damaged.
Walo ti naireport a nasugatan.
Ti ili ti San Fabian a nakapasar iti flash flood kabayatan ti bagyo ket nagdeklara ti state of calamity idi Setiembre 17. Manipud kadagiti report ti PNA, PIA Region I, PGIN, Pangasinan PIO / ABN

Amianan Balita Ngayon