Pak, boomm, brang, bonggg!

January 11, 2019 Sirmata ken Tagtagainep ni Mang Gusting

Naimbag nga aldaw tayo manen kakailian, kaarruba, gagayyem ken saan a gayyem, hehehee, unayen Kayong Angkuan ta uray saanen a gagayyem. Kumusta met ti panangrambak yo iti baro a tawen? Koma, awan nadisgrasia kadakayo gapu iti paputok.
Paputok, maysa a wagas ti kaaduan a mangpasungad iti baro a tawen saan laeng a kadatayo a Pilipino, uray iti sabali a nasion. Iti siudad nga ayan tayo Kayong Angkuan, bayat a masursurat daytoy a kolum tayo, segun iti nakalap tayo a report wenno record ti Baguio City Police Office, nai-record da a zero injury ti siudad manipud iti firecrackers ken indiscriminate firing bayat ti panangpasangbay tayo iti New Year 2019.
Nagpintas daytoy a damag. Segun kadagiti maseknan, ad-adda pay a napegpeggad ti sobra a panaginum iti arak wenno panagbartek a mangdadael iti salun-at. Wen, Kayong Angkuan, bigbigat pay laeng idi December 31, 2018, addan aglalaaw a kaarrubami. Nalabit pinarbangondan ti naginum ngem kurang sa pay la’t nainumna. Ania la ketdin aya nga agpayso. No ania ket ngamin ti maala iti arak a kunada ket makapaubing.
Hahaha, apay a makapaubing kunam seguro, Kayong Angkuan. Wen, no malabsam ti aginum, agkaradap wenno agbasing-basing a magna a kasla agsursuro a magna. Adda pay agsarimbaboy ah, isu a kunada a makapaubing ti arak. Saan laeng a dayta, makapaubing kanu ta ubing a matay hahaha. Sus Maria kusina aya, tay kunada ngarud. Ania man a banag, dakes no nalabes.
Ti napaliiw tayo idi bispiras ti baro a tawen, awan unay nagpaputok ken apagbiit laeng ta kasano ket nagarbis wenno intodona pay ketdi. Isu a daras dagiti tattao a simrek iti babbalayda. Ngem nasayaat la unay dayta a napasamak nga uray dagiti nagaron iti atong wenno bonfire a kunada ket saandan a nagbayag iti ruar. Dagiti dadduma, impapasda laengen ti nagbartek.
Iti sabali a bangir, naoso ti kunada a fireworks display nangruna no adda dakkel nga event wenno okasion. Kas iti siudad, idi bepisras ti paskua adda naangay a fireworks display iti dakkel a mall. Kasta man met laengen iti manguri wenno opening ti kunada a Christmas season, adda man laengen kasta ket mismo pay a siudad ti nangiwayat no ditay agbiddut. Wen, makaay-ayo dayta ngem saan kadi nga agparikut tayo iti Climate Change a gapuanan ti Global Warming? Dakkel ti makuna a kontribusion dayta nga aramid iti panagbara ti lubong nga agtungpal iti Climate Change.
Ala ket, talaga a kasta ti biag. Adda latta gundaway a makalipat tayo. Natural ti panagbiddut ket maasot ti sennaay a kunada ngem adda latta met siled ti panagbabawi. Ngem ti babawi ket kanayon nga adda iti udi. Ti kayat tayo nga ipaawat, makalipat tayo no maminsan ket makaamiris tayo, naladawen ta addan naibatina a didigra iti sangatao-an, satayto la makaamiris no addan dakes a napasamak kadatayo.
Nagasat tayo ita ken makuna a record ti kaawan nadisgrasia gapu iti paputok. Very good. Mabalin a bunga daytoy ti pannakaipariten iti panaglako iti paputok wenno rebintador iti siudad ken kanayon a palagip wenno advisory ti ahensia nga akin-sakup iti daytoy a benneg wenno departaminto ti salun-at ti gobierno. Kudos kadagiti maseknan, good job. Ngem ti kangrunaan a nairanud ket datayo ta awan naperhuisio.
Opssss, kakayong, naimasantayo manen ti nagsasarita ket neh amangan no kita-kitaennak manen ni editor. Ala kasta, agingga iti sumaruno manen nga intay panagiinnistoria. Happy New Year kadatayo amin, babayooo tsuptsup muahmuah.