PANAGSAGANA TI DIDGRA TI REHION TI ILOCOS MAPABILEG TI HANDA PILIPINAS EXPO

June 7, 2024 Headlines

SIUDAD TI SAN FERNANDO, La Union

Maysa nga exposision a mangpalgak kadagiti lokal a napataud a teknolohia iti panagsagana ti didigra iti maangayto idiay Siudad ti Laoag inton Hulio 3-5 ita a tawen nga idauluan ti Department of Science and Technology (DOST).
Imbaga ni DOST 1 Regional Director Dr. Teresita A. Tabaoag nga iti pasamak a naawagan nga “HANDA Pilipinas” ket panggepna a pasayaaten iti panagsagana ti didigra babaen kadagiti teknolohiko nga inbension a napataud ditoy Rehion ti Ilocos.

Kinunana nga ti exposision ket naintempuan gapu ta iti Pilipinas ket agtaltalinaed a maysa kadagiti kangrunaan a
maapektaran a pagilian sigun iti World Risk Index. Dagiti bagyo ti makagapu iti 55 a porsiento kadagiti natural a peggad a sangsanguen ti pagilian iti napalabas nga uppat a dekada, 25 porsiento ket nainaig kadagiti layus, lima a porsiento ti tunggal maysa para kadagiti ginggined ken panagreggaay ti daga, uppat a porsiento iti panagbettak ti bulkan, ken ti nabati manipud iti tikag, uram ti kabakiran ken epidemia.

“Ti Pilipinas ket maysa a pagilian nga agpegpeggad iti didigra. Ti itantandudo ti DOST ket iti panagsagana iti didigra.
Kayattayo nga ammo ti tunggal maysa nga dagiti didigra ket mabalin nga umay ken pumanaw ngem kabaelantayo a tamingen ida,” kinuna ni Tabaoag. Karaman kadagiti teknolohia a maipabuya bayat iti tallo nga aldaw a pasamak
mairaman ti GeoRiskPH, maysa nga teknolohia a mangted iti maysa a plataporma para iti pannakaiwaras ti impormasion maipapan iti peggad tapno matulongan dagiti lokal a gobierno, iti tattao, dagiti komunidad, ken dagiti nasional nga ahensia ti gobierno.

Iti nadakamat nga impormasion ket panggepna a tumulong iti panagplano ken panagsagana kadagiti estratehia
tapno mapababa dagiti peligro dagiti natural a peggad. “Ipabuyami dagiti baro a teknolohia kas suporta iti uppat
nga adigi ti DOST ken sungbat iti 8-point Socio-Economic Agenda ti administrasion ni Presidente Marcos,” kinuna ni Tabaoag. Saan laeng a basta maysa nga exposision, imbaga ni Tabaoag nga iti ultimo a panggep ket para kadagiti local government unit ti Rehion 1 a makibagay kadagiti teknolohia a maipabuya.

Maigapu iti daytoy a panggep, ti Regional Development Council (RDC) 1 ket nangaramid met ti Resolution No. 6, series of 2024 nga iendorso iti panangawat kadagiti maitutop a teknolohia ti DRRM dagiti lokal a gobierno iti Rehion
1. Nangipaulog met iti Department of the Interior and Local Government (DILG) Region 1 iti maysa a
memorandum tapno allukoyen dagiti lokal a gobierno a makipaset iti exposision.

(CCMT-PIA LU/PMCJr.-ABN