Panagungar

April 15, 2017 Opinion Sirmata ken Tagtagainep ni Mang Gusting

Yahooo, yahoooo! Naimbag nga oras kadatayo amin kakailian. Buenos dias eh Paquito Diaz este naimbag nga aldaw malem ken rabii tayo amin depende iti inkay panangbasbasa iti daytoy pagiwarnak tayo ken kolum tayo. Kmusta metten ti biag tayo Kayong Angkuan, kumusta ti bakasyontayo. Sus, no dakami ti inkay damagen, awan latta Kayong Angkuan ti nagbaliwanna. Isu la isu a kunada. Daytoy, nalpasen ti Panagungar a kunada ni Hesu Kristo a Mannubot tayo ngem kas intay napaliiw, di latta agungar ti kasasaad ken ug-ugali tayo.

Iti Semana Santa, Kayong, Kailian, reprep wenno nagadu ti simmang-at a bakasionista ditoy batugmi a langit wenno ditoy siudad ti saleng. Napno amin nga inn, hotel ken dagiti boarding house kas kada transient houses. Adu payen ti nagyaplag kadagiti parke. Kayatna a sawen, dakkel manen ti napastrek ti siudad, pimmigsa ti ekonomia kunatayo koma…awan makuna tayon iti dayta. Ngem, adda laeng nadillaw tayo Kayong kadagiti dadduma a nagbalin a sangaili tayo ditoy siudad iti lawas ti ngilin. Adu latta ti narugit ti pampanunotna este adda iti dapan ti nagadalan da. Awan latta, saan latta a nagungar ti kinaimbag iti pampanunot ken kaunggan tayo ta di pulos nagbaliw ti panunot tayo. Apay kunam seguro, Kayong. Ngem, awan disiplina ti kaaduan a kailian tayo. Kasano koma nga umasenso tayo aya ket adu latta ti awan manaknakemna ket kasla basura ti utek tayo. Ne, apayen kayong Gusting kunam ngata Kayong ngem pudno ti kunak. Saan a kasta ti sirmata tayo ken tagtagainep tayo para iti patgentayo a siudad ken nakaparsuaan. Ti intay nasirsirmata idi ket nangayed latta koma ti lubong, saluadan dagiti parabur ti Apo kas ti aglawlaw…ngem kas iti intay nakuna.

Daytoy ti innak napaliiw, Kayon, basura ditoy basura idiay kadagiti parke ken agpapan iti overpass ditoy siudad. Kas intay met pagaammo, adda met dagiti basuraan ket dita ngem, saanko nga ammo no adda panunot dagiti kailiantayo a turista wenno bwisita este bisita ta dayta laeng nagiwara iti basura it inaramidda. Kas iti intay nakuna, saan nga amin ngem, ad-adunsa ti basura’t panunotna. Talaga nga adu’t adda iti dapanna ti nagadalanna a kunak ngem, ti saanda nga ammo isuda met laeng ti agsagrap iti dakes nga epekto daytoy nga inaramid da. Imbes koma a nangayed ti paggargarawanda a lubong, saan ta pasig met a basura, sus maria kusina, ania la ketdin nga agpayso ti tao. Isu ngarud nga inikkannatayo iti panunot ti Apo, ngem saantayo met nga usaren.

Sumagmamano laeng dagita nga intay napaliiw, Kayong. Uray idi mismo a kaaldawan ti Huwebes santo ken Biernes santo, kas intay nadakamat iti nalapabas a kolum tayo, dakkelen ti nagbaliwan ti panawen. Saanen a kas idi a no lawas wenno panawen ti ngilin nakaul-ulimek, maiparit ti agriaw wenno uray agsao laeng iti napigsa. Addaka laeng a nakaludag dita ngem ita metten…Sus maria kusina, adda pay diay kaarrubami a kunam no piesta ti kapigsa ti sound system na iti panagpatokarna.

dda met tay awan la’t inar-aramid da no saan a nagkankanta iti videoke. Sus Ama, pakawanem ida, talaga a didan ammo ti inar-aramid da. A, ngem ala sapay la koma ta agungar met laeng ti pampanunot ti tunggal maysa ket rugyan tayo metten a pagungaren ti kinaimbag kadagiti puspusotayo ket iwalin wenno iwaksi tayon dagiti madi nga ar-aramid tayo.

Ala, kasta pay Kayong, naimasanta manen ti naginnistorya ket makaluksaw to manen ni Kabagismo Sofing ta dinan mauray toy pinagatangna a manteka. Babayoo, tsuptsup muahmuah.