PANNAKAIBANGON KADAGITI RAINWATER HARVESTING FACILITIES NAIDAGADAG ITI KAMARA

SIUDAD TI BAGUIO

Idagdagadag ni Ilocos Norte (2nd District) Rep. Angelo Marcos Barba iti pannakaibangon kadagiti
rainwater harvesting facilities (panagurnong iti danum iti tudo a pasilidad) kadagiti amin a development projects iti pagilian tapno makatulong a mangtaming iti umad-adani a krisis iti danum. Panggep iti House Bill (HB) 2412 a mangtarigagay a mangimandar iti pannakaibangon kadagiti rainwater harvesting facilities kadagiti baro a publiko ken pribado a commercial, institutional, ken residential developments iti intero a pagilian tapno maksayan iti layus ken tumulong a mangkonserba iti mainum a danum.

“The passage of HB 2412 is timely especially now with the onset of the rainy season (Iti panangipasa iti HB 2412 ket naitiempuan nangruna ita a panangrugi iti panawen iti panagtutudo),” kuna ni Barba iti maysa a pagsasao idi Huebes kalpasan iti umuna a panangamong iti umuna a
deliberasion daytoy. Ni Barba, nga agdama nga agserserbi kas chairman iti Technical Working Group a mangad-adal iti pamay-an, kunana nga iti panagurnong iti danum iti tudo ket adu ti pagimbaganna. Mausar daytoy para kadagiti saan a panaginum a panggep kas iti panaglaba iti
kawes, dagiti pinggan, ken kadagiti lugan, pagdalus iti inidoro, ken kasta met para iti panaghardin.

Mainayon pay, mangkissaymet iti panagurnong iti danum ti tudo iti pakasapulan iti danum iti uneg ti daga, a mabalin a pakaigapuan iti panagrebba ti daga a dati nga ayan iti danum, iti kasta tumulong a lapdan dagiti kumarkaron a problema iti panaglayus kadagiti nababa ken nalaka a malayus a lugar iti pagilian. Iti naisingasing a linteg ket kalikaguman a dagiti agtagikua wenno developers kadagiti baro a development projects a mangilasin, pasayaaten, ken imentenar iti uray 3 porsiento ti dagup a kalawa ti proyekto kas maysa a rainwater harvesting facility.

Kas suporta iti daytoy a pamay-an, dagiti local government units iti Ilocos Norte ket nangrugin a nagbangon iti ad-adu pay a rainwater harvesting facilities tapno mangpalag-an iti epekto iti climate change. Dadduma ket nangipatakder iti babassit a reserborio ti talon a maus-usaren ita dagiti mannalon a mangtaming iti kinakirang iti danum kadagiti nadumaduma a lugar iti probinsia, nangruna iti panawen ti tikag.

(LA-PNA Ilocos/PMCJr.-ABN)

Amianan Balita Ngayon