Paskuan kayong Angkuan!

January 10, 2019 Sirmata ken Tagtagainep ni Mang Gusting

Naimbag nga aldaw tayo manen kakailian, kaarruba, gagayyem ken saan a gayyem, hehehee, unayen Kayong Angkuan ta uray saanen a gagayyem. Ngem pudno met saan kadi, kunana ngarud ayatem ti kabusormo. Ania ti madamag dita batug yo a langit kakailian, masasay-open ti pul-oy ti Paskua, kumutokoten ti lamiis manipud kunada nga angin seberia. No dakami met ti inkay amaden, ay ket awansa ti makuna a summer ditoy siudad ti saleng ta no makalagip uray ania a tiempo wenno bulan ket nalammin ken agtodo.
Manu la nga aldawen wenno turogen, paskuan Kayong Angkuan, nakasagana ka kadin a mangpasangbay iti aldaw a naindaklan? No kaanu nga umas-asideg, maasut met ti adu a sennaay iti kaduan a kailian. Ania ti rason, nalabit a kunam, Kayong. Adu, umuna, ngimmato ti presio dagiti kangrunan a gagatangen wenno prime commodities a kunda, dagiti ramen dagiti maisagana para iti panangrambak iti aldaw a pannakaipasngay ti Mesiah. Nupay iti sabali a bangir, nagsasaruno a bimmaba ti presio ti gasolina ngem adu latta met ti aglibbi gapu ta adu ngarud ti ngimmato’t presio na a gagatangen.
Kaaduanna a no ngumato ti presio ti gasolina, sumarsaruno met a ngumato ti presio dagiti gagatangen.
Ti saludsod, apay a no bumaba ti presio ti lana wenno gasolina ket saan a sumurot a bumaba ti presioda? Saan kadi, Kakayong?
Ala, iwaksi tayo man pay a pagsasaritaan dagiti parikut ta intay ketdi agraragsak, iparikna ti innayat tunggal maysa. Tay kunada ngarud koma, Paskua nga inaldaw. Kayatna a sawen, agari koma ti ayat ken panagpipinnakawan. Ania met ngay Kayong Angkuan ti inregalom wenno isagutmo ken ikit Juaning? Kadagiti dadduma, saan a napateg ti gatad wenno balor ti maawatda a regalo, ta ti kaipapanan ti panangipaay iti regalo ti kapatgan kas iti inaramid dagiti tallo nga ari idi napanda nagdaydayaw iti Mesiah.
Puera delos Buenos a kunada, adda dagiti nasakit ti nakemna a makaawat iti basbassit ngem iti balor ti inregaloda, banag a saan a husto saan kadi Kayong Angkuan? Kas tay istoria ni Kayong Jun, adda kanu tay ibagbagada nga exchange gift iti opisinada ket ti balor ti regaloda ket saan a bumaba iti dua gasut, ti dakesna, adda kanu nagregalo kadakuada iti UK wenno naggapu piman iti
ukay-ukay. Ay piman aya, binungonna kano met dayta a regalo diay immawat ket insublina iti nangted, puon payen ti apada ket didan nagsasao iti makatawen. Ania ngay dayta, ket ania’t makunam, Kayong?
Sorry po, batubatu sa langit, ang tamaan bukol este di magagalit. Dagitoy ket naibasar laeng iti paliiw tayo kadagiti mapaspasamak ta pudno nga adda ti kakasta. Dida payen maki-exchange gift ta amangan no basbassit to ti balor ti maawatna wenno napimpintas ti intedna ngem ti naawatna. Idi dakami ti ub-ubbing, unay a ragsakmi a makisinnukat iti regalo… excitedka pa a manglukat, ngem awan dayta agsakit ti nakemna no napimpintas ti inregalona ngem tay naawat. Ita, kadagiti agtutubo, adda ngata kasta pay. Awan met ngatan ta adda metten maituding a balor ti regalo, ken adda payen tay tallo a request ti mabunot, kumporme kadagiti tallo, wow, good idea dayta Kayong Angkuan. Mapatgan ti kiddaw tay maregaluan ket seguro a dinto agsakit ti nakemna, di ngamin, Kakayong.
Opssss, kakayong, naimasantayo manen ti nagsasarita ket neh amangan no kita-kitaennak manen ni editor. Ala kasta, agingga iti sumaruno manen nga intay panagiinnistoria, babayooo…tsuptsup muahmuah.