PDEA, kaya bang magsolo?

Muli ay nasa sentro na naman ng paningin ng madla at sambayanang Pilipino ang Philippine Drug Enforcement Agency (PDEA) matapos hirangin kamakailan ni Pangulong Rodrigo Duterte na maging ‘solong ahensiya’ na pangunahing gaganap, nagtatrabaho sa kampanya ng gobyerno laban sa mga ilegal na droga.
Inatasan ni Pangulong Rodrigo Duterte ang Philippine Drug Enforcement Agency (PDEA) na solong mangunguna sa pagsasagawa ng ‘Oplan Tokhang’ o anti-drug campaign habang pinagbabawalan na ang Philippine National Police (PNP), National Bureau of Investigation (NBI), Armed Forces of the Philippines (AFP) at iba pang law enforcement agencies.
Sa Memorandum mula kay Pangulong Duterte  na nilagdaan noong Martes ay ipinagbawal na nito sa PNP, NBI, AFP at iba pang law enforcement agencies ang pagsasagawa ng anti-drug operations at sa halip ay eksklusibong ipapatupad na lamang ito ng PDEA gaya ng nakasaad sa RA 9165 o Comprehensive Dangerous Drug Act of 2002.Nag-ugat ang kautusang ito at tila napilitan ang Pangulo na gawin ito dahil sa mga batikos at oposisyon sa mga operasyon ng PNP na nagbunga ng mga alegasyon at paratang na umiiral ang “extra judicial killings” (EJK) sa bansa.
Nadagdagan pa ito nang maglabas ang Social Weather Stations (SWS) na ipinapakitang bumulusok pababa ang public satisfaction ratings ni Duterte ng 18 puntos, mula +66 noong Hunyo sa+44 nitong Setyembre. Ang pagbaba ng rating niya ay isinisi sa patuloy na mga pagpatay ng kaniyang (Duterte) marahas na giyera laban sa droga na pinapaniwalaan ng iba na umabot na sa 3,850 kamatayan bunsod ng operasyon ng kapulisan habang nasa 2,290 ang pinapaniwalaang pinatay ng mga vigilantes.
Ang katotohanan ay PDEA ang tangi at tunay na pangunahing institusyon na may mandato ng batas upang labanan ang ilegal na droga sa Pilipinas. Itinatag ang PDEA noong 2002 upang ipatupad ang mga probisyon ng Comprehensive Dangerous Drugs Act of 2002. Ang mahalaga pa dito ay PDEA ang itinuturing na kamay na tagapagpatupad ng Dangerous Drugs Board (DDB) – ang policy-making at strategy-formulating body sa drug prevention and control sa Pilipinas.
Sa ngayon ay 1,274 ahente lamang mayroon ang PDEA at ang bilang na ito ay lubhang nakakabahala – may kapasidad ba ang opisina upang isulong ang kampanya? At ngayong nagsosolo na sila ay kailangan nilang magdoble o triple pang magtrabaho dahil sa napakalawak ng sakop nila higit pa dito ang maladambuhala, napakalawak at madulas na operasyon ng ilegal na droga. Kaya ba ito ng PDEA na nag-iisa lamang?
Ang laban sa ilegal na droga ay sukdulang nakakatakot na kahit pa bago ang administrasyon ni Pangulong Duterte ay kinakailangan ang tulong ibang ahensiyang tagapagpatupad ng batas upang isagawa ang trabaho.Ang napakalaking tanong ay kaya bang pangunahan ng PDEA ang giyera laban sa droga at kakayanin pa ba nila? Kung si PDEA chief Aaron Aquino ang tatanungin ay maliwanag na kailangan pa nila ang PNP lalo na at mahigit lamang na isang libo ang kaniyang tauhan.
Maaaring ang pagpapalit ng mangungunang ahensiya laban sa droga ay makakatulong ibalik ang integridad ng marahas na kampanya at matigil ang mga pagpatay at ang hindi-tapat at korap na mga opisyal ng pulis ay nagbayad na at magbabayad pa para sa kredibilidad ng PNP sa pagsasagawa ng operasyon laban sa droga. Maaari ding ang desisyon na ito ni Pangulong Duterte ay matitigil na ang pagdanak ng dugo at gawing ligtas ang bawat kalye para sa lahat – lalo na para sa kabataan. At ngayong PDEA na ang mamumuno sa kampanya ay kinakailangan at mahalagang magkaroon at mabihisan ito ng “professional anti-drug personnel” na magsasagawa ng operasyon na may integridad at respeto sa kaukulang proseso.
At kahit pa nagpalit na ng awtoridad ay hindi dapat maligtas ang mga opisyal ng pulis at gobyerno na may kinalaman sa droga at nagtaksil sa bayan. PMCJr.

Amianan Balita Ngayon