Pebrero, bulan dagiti puso, owww!

February 5, 2018 Opinion Sirmata ken Tagtagainep ni Mang Gusting

Naimbag nga oras yo amin kailian ken kaarruba, adtoy manen ti nanumo a pagayamyo nga umay maki-abrasa ken makinnistoria ken makinnisem kadakayo babaen iti ABN. Sapay la koma ta pia ken nakaradkad latta ti adda kadakayo a sangbayan manen daytoy kolum tayo ket makaipaay kami manen iti ray-aw ken impormasion kadagiti mapaspasamak iti aglawlaw tayo. Saan koma ngarud a dagensen iti barukong ti intay pasaren, Kakayongmi ida.

Ala, sapay la koma ngarud ta umisem kayo man iti daytoy inkam ipadigo ita…

Iti maysa a domingo, agsarsarita ti sakristan ken ti padi kalpasan ti mesa, kuna ti sakristan—

Sakristan: Father, ikompisarko koma ti nagbasolak.

Padi: Ania kadi dayta anak?

Sakristan: Nasulisogak a nagsirip, Father. Nakitak ngamin ti kaarrubami a balasang a mapan agdigos iti banyoda…

Padi: Ituloymo, anak.

Sakristan: Idi aguksob koman, isu met a nagiddep ti silaw, awan koriente.

Padi: Annak ti sinalbag dagita a mangmangted korienten!

Ala kakayong, patalastas laeng dayta tapno umisem wenno agrungiit kayo met bassit, no makaisem kayo, ah. Tay kunada ngarud, napapaut kanu ti biag tay managkatawa wenno managisem ngem tay nakamisuot a kanayon.

Ala, panawan tayo man la da Apo Padi ken sakristanen, amangan no sadino pay ti turongenna. Ammoyo kadi ti istorya ti Valentines day a kunada? Ala, bay-anyo ta agsukisok tayo ta ibinglay min to kadakayo no apay a maselebraran dayta makuna nga aldaw wenno bulan ti puso. Ket, dakayo, ania met ti makunayo? Asino ti makaammo?

Ket sika Atong, adda nabirukamon a kabalintinam a kunada? Ngem—ammok nga awan essem mo ti kasta ania ta sabali ti kursonadam, tay numero ti hueteng a tayaam weno anunsio nga inka kalagem…ala, madamdamanto.

Sublian tay man ti topiko tayo itay maipapan iti bulan dagiti puso… no kuna a daytoy a bulan ket bulan dagiti puso a kayatna a sawen agi-innayat tayo, apay ngarud nga adu latta ti agaapa? Adu ti agsisina nga agayan-ayat ken agassawa pay ketdi, koma saan laeng a bulan ti Pebrero ngem ketdi inaldaw nga adda ti ayat iti kaunggan tayo. Kasta koma. Kas met laeng ti naglabas a Paskua a kunada, ti Paskua ket ayat ti kaipapananna, daytoy ngaruden bulan ti Pebrero? No kunada nga aldaw dagiti puso a kayatna a sawen, innayat met laeng ti kaipapananna.

Koma, aldaw man dagiti puso, paskua man, koma inaldaw nga agari ti innayat ta dayta ti pagayatan ti Dios. Awan aggiginnura, awan agpipinnasakit…pakawanem dagiti nakabasol kenka tapno mapakawanka met. Ngem, apay adda met dagitay makita nga aginaldaw a sumsumrek wenno mapmapan iti kapilia wenno simbaan, adda pay diay yawisda no maminsan a bible study kanu idiay balayda ngem ti dakesna, dina met mapakawan tay kaarrubana? Kasta kadi ti makuna a mannakimesa wenno mangibagbaga a daytoy ket Kristiano? Ayan ti anag innayat nangruna no paskua kas kada bulan ti Pebrero a bulan dagiti puso? Adu dagiti biktima ti manangallilaw nga ayat, adu dagiti maiwawa a kararua ta kalpasan a magun-od da ti kalkalikagumanda iti maysa a babai, agpukawdan a kasla asuk? Sus maria kusina, pakayangem este pakawanem ida ta dida ammo ti ar-armaidenda. Isu a ti maibalakad mi, saankayo a basta agtalek ken dikay pay isuko ti bandera agingga iti dikay makapagkasar, klaro? Intiende!

Adda pay daydiay mapalpaliiwmi kakayong. Ammom a mannakimesada a pamilia. Awan Domingo a dida makimesa, ngem mangmangngeg met ngarud ti laawda a dandani rinabii, agaapada nangruna dagiti agassawa. Kasanu ngarud a patiem ita a Kristianoda wenno adda Dios da?

Ne, ne, ne, Kakayong naimasantayo manen a kunak. Isu a baliwantay to manen, a, kasta pay pare Jun, Editor Thom, nangruna ken Ading Melanie a nakaan-anus a mangur-uray iti kulom tayo, ania adda kabalintinomon Ading Pintas? Agkakape tayo man no maminsan dita opisina, mailiwak met a maki-innistorya kadakayo… Kasta pay, babayooo, tsuptsup muahmuah.