PHLPOST NANGIPATULOD ITI 723K PHIL ID SADIAY REHION TI ILOCOS

May 28, 2022 Headlines

ILOCOS NORTE – Nangipatulod ti Philippine Postal Corp. (PHLPost) iti 723,524 Philippine Identification (PhilID) cards wenno iti national ID kadagiti nagparehistro sadiay Rehion ti Ilocos agingga Abril 15.
Iti maysa nga interbiu ti telepono idi Lunes, imbaga ni Philippine Statistics Authority (PSA) Ilocos information officer Jim Ian Bautista nga iti dagup a bilang a 19,380 ket naipatulod sadiay Ilocos Norte; 182,923 idiay Ilocos Sur, 205,064 idiay La Union; ken 316,157 iti Pangasinan.
“The PSA partnered with Bangko Sentral ng Pilipinas for card production while the PHLPost administers the doorto- door delivery (nakikadua iti PSA iti Bangko Sentral ng Pilipinas para iti pannakapataud iti card bayat nga iwanwanwan ti PHLPost iti binalaybalay a panangitulod),” kunana.
Innayonna a karaman iti numero dagiti naisubli iti nangipatulod agsipud ta natayen iti nagparehistro wenno immakar ti pagtaengan. Imbaga ni Bautista nga iti pannakataktak ti panangitulod iti dadduma a PhilID ket nalabit a gapu iti doble a panagparehistro wenno duplikasion isu nga nasken iti pammasingked kadagiti record idiay PSA.
Itultuloy dagiti opisina ti PSA kadagiti probinsia iti panangaorganisar iti mobile registrations iti pannakitinnulong dagiti ahensia ti gobierno, non-government organizations, ken pribado a kompania.
“The institutional registration strategy ensures the staff and employees will have safe and convenient [Philippine Identification System or PhilSys] registration (iti estratehia nga institusional a panagparehistro ket maipasigurado a maaddaan iti natalged ken naannayas panagparehistro),” kuna ni Bautista.
Para kadagiti nakaawaten iti PhilID, upayen ti PSA isuda a saanda nga ipost dagitoy a card iti online wenno ipabulod kadagiti sabali a tattao a mabalin a makopia daytoy wenno mapalsipika, nangruna iti PhilSys number, a naisangsangayan iti tunggal indibidual.
(HA-PNA Ilocos/PMCJr.-ABN)