Policing system inggana barangay ipatungpal ti LU

October 21, 2018 Provincial

SIUDAD TI SAN FERNANDO, LA UNION – Natibtibker a pannakaipatungpal dagiti programa iti linak ken kappia ti
manamnama a pagbanagan ti kalkalpas a tulagan ti probinsial a gobierno ti La Union (PGLU), National Police Commission (Napolcom), Philippine National Police (PNP) Regional Office 1 (PRO1) ken Liga ng mga Barangay idi Oktubre 16, 2018 iti Diego Silang Hall, Provincial Capitol ditoy siudad.
Ti memorandum of agreement para iti Community and Service-Oriented Policing (CSOP) System ket pinirmaan da
Gov. Francisco Emmanuel “Pacoy” R. Ortega III, Napolcom executive officer Atty. Rogelio T. Casurao, PRO1 Regional Director PCSupt. Romulo E. Sapitula, ken Liga ng mga Barangay-La Union Chapter Ex-Officio Provincial Board Member Geraldine R. Ortega.
Nailanad iti nakuna a katulagan dagiti akem ti tunggal maysa iti pannakataginayon ti linak, kappia ken seguridad ti
publiko iti lokalidad. Ti CSOP system ket binukel ti Napolcom tapno mapatibker ti PNP iti akem daytoy kas “community and serviceoriented agency”. Paspasingkedan daytoy ti kooperasion ken koordinasion iti triad a buklen ti local chief executives, chiefs of police, ken community leaders.
Babaen iti daytoy a sistema, madegdegan ti linak ken kappia ken panangipatungpal ti akmen ti lokal a gobierno tapno maidatag dagiti kangrunaan a serbisio, benepisio ken panagdur-as kadagiti lokalidad.
Iti mensahena, ingunamgunam ti gobernador ti napigsa a commitment ti PGLU tapno mataginayon ti linak, kappia ken kinatalged iti probinsia.
Kinunana a ti linak ken kappia ket kanayon a paset ti adigi ti transformative governance nga iyad-addang ti
probinsia tapno agbalin nga “Heart of Agri-Tourism in Northern Luzon by 2025”. MDBILAR, GPC-SSU / ABN