Presyo ng strawberry, tumaas dulot ng kakulangan ng supply

February 10, 2018 Provincial

LA TRINIDAD, BENGUET – Dahil sa kakulangan ng suplay ng strawberry, tinatayang tataas ang presyo nito sa mga darating na araw sa mga pamilihan hindi lang sa bayang ito kundi maging sa karatig na lungsod ng Baguio.
Ayon sa strawberry vendor na si Leonida Soriana, maaaring magtaas na sila ng  presyo ng strawberry sa mga pamilihan sa mga darating na linggo, dagdag pa niya na magtataas ang presyo ng strawberry dahil sa mababa ang supply nito na nanggagaling pa sa iba’t ibang lugar sa Benguet.
“Magtataas lang kami ng presyo siyempre kapag nagtaas din ng presyo yung mga nag-de-deliver sa amin, kapag mataas ang bigay nila kailangan din naming magtaas kundi malulugi naman kami”. Sa ngayon marami pang strawberries na idini-deliver kung kaya’t medyo mababa pa ang presyo. Mas mababa ang presyo ng strawberry kapag weekdays kaysa sa weekend ayon sa mga vendors sa City Public Market. Nangako naman ang mga vendor na hindi sila mag-o-over pricing sa mga turista na dadagsa sa lungsod ngayong Panagbenga Festival.
Umaabot ang presyo ng strawberry mula P150-P250 kada kilo depende sa klase ng strawberry na kadalasang ang mga malalaking strawberry ay mas mahal ng kaunti kaysa sa mga maliliit na hugis. Inaasahan din na maaaring magtaas ng presyo ang mga vendor sa darating na linggo na maaaring umabot ng P180-P300 kada kilo.
Inaasang magdaragsaan ang libo-libong turistang makikisaya sa pagdiriwang ng Panagbenga Festival, ayon sa Tourism Department kung kaya’t ito ang magandang pagkakataon na ibida ang mga produkto ng Baguio City, ito rin ang magandang pagkakataon na kumita ng malaki ang mga business establishment sa lungsod. ALLAN LEMUEL SUNGA, UB Intern / ABN