PRO1 BALIWANNNA DAGITI ESTRATEHIA TAPNO MATUNGPAL TI BARO A DIREKTIBA TI BARO NGA HEPE TI PNP

June 8, 2025 Headlines

SIUDAD TI SAN FERNANDO, La Union

Ti Ilocos Police Regional Office (PRO1) ket mangbalbaliw iti operasion tapno matungpal dagiti baro a direktiba ti baro a naikabil a Philippine National Police (PNP) Chief Gen. Nicolas Torre III. Imbaga ni PRO1 Director Brig. Gen. Lou Evangelista iti maysa a forum idi Huebes a dagiti yunit ti polisia iti rehion ket mangisayangkatda itan kadagiti regular a panagsanay tapno matungpal ti target a panagsungbat ti hepe ti PNP a tallo agingga iti lima a minuto. Kinunana a ti agdama a promedio nga oras ti panagresponde iti rehion ket 3.8 a minuto.

Kinuna ni Evangelista a tapno matungpal iti bilin ti baro nga hepe ti PNP, binaliwanda dagiti mapa ti krimen iti rehion, pinapigsada ti pannakakita dagiti polis, nasanayda kadagiti teknolohia ti komunikasion ken impormasion, kas paset kadagiti addangna a mangpabaro kadagiti pannakaipakat ti linteg ken mangipasigurado iti dagus a kaadda dagiti polis kadagiti kritikal a kasasaad, a mangpasayaat iti kappia ken urnos, ken mangaramid kadagiti kalsada a nataltalged para kadagiti Filipino. “Dandani inaldaw nga agar-aramidkami kadagiti panagsanay tapno maragpat ti kalat,” kinunana.

Innayonna nga us-usaren ti Regional Police ti kabaruan a teknolohia iti komunikasion kas iti push-to-talk over cellular, tapno masigurado ti di nasinga a komunikasion aniaman ti lokasionna. Kinuna ni Evangelista a ti nasurok a 10,000 a puersa ti polisia iti rehion ket estratehiko a mausar tapno ad-adda a malapdan dagiti kriminalidad. Iti laksid dagiti agtultuloy a panagregget, inamin ni Evangelista a ti PRO1 ket maipasango pay laeng kadagiti karit iti lohistika, alikamen, ken manpower.

Kinunana a dagiti reinforcements manipud kadagiti mobile force batallion ken local force multipliers ti maus-usar a mangpunno iti giwang, nangruna kadagiti border checkpoints ken emerhensia a kasasaad. Mausarto met dagiti force multiplier kas maysa a kanayonan a puersa. Nagkiddaw ni Evangelista iti Kongreso a mangiduron iti kanayonan a panangrekrut kadagiti polis ken mangituding iti ad-adu a pondo para iti panaggatang kadagiti alikamen.

(HA-PNA Ilocos/PMCJr.-ABN)