PROBLEMA ITI TRAPIKO, SOLID WASTE MANAGEMENT KEN SEWERAGE, KANGRUNAAN A PROGRAMA MATUTUKAN ITI AGDAMA A TAWEN

January 6, 2024 Metro BLISTT

BAGUIO CITY

Kangrunan a matutukan ita a tawen dagiti parikut ti trapiko, solid waste mangement ken sewerage problem iti Baguio City. Iti pannakiuman ti Bombo Radyo kenni City Administrator Engr. Bonifacio Dela Peña, nakikoordinardan kadagiti nagduduma nga ahensiya maipapan iti nasao a pakaseknan.
Dinakamatna nga ituloyda latta ti smart mobility program dagitoy ken manarimaanen ti negosasyonda para iti panakaipatungpal daytoy.

Malaksid iti dayta, kinuna a nagsapuldan ti strategic locations para iti parking facilities a tagikua ti local government unit nu sadino dumanon iti duapulo ket maysa (21) pakairamanan iti maysa pay
a pribado a lote. Inlawlawag ni Dela Peña nga iti sidong ti Public Private Partnership (PPP) ket 30 percent ti bingay ti siudad.

Impaganetgetna pay a nabigbigen dagiti parking facilities pakairamanan ti BFP – Baguio station, PFVR, Convention center, Gibraltar, Bayan park ken daduma pay. Iti sabali pay a damag, imbinglay ni City Administrator Engr. Bonifacio Dela Peña a naipatungpal ti Memorandum of Agreement iti Mayor ti Sablan seknan iti panakaibangon ti waste to enregy project.

Daytoy ket tapno matulongan iti solid waste management ti siudad. Impeksa ti opisyal a dakkel
a tulong daytoy apaman a maipatakder gapu ta dakkel ti magasgastos ti siudad seknan iti panaghakot kadagiti basura ken pannakaipatulod daytoy idiay Tarlac iti agdama. Mangnamnama met ti opisyal nga agtultuloy ti nasao a panggep iti nagbaetan ti siudad ken Sablan.

Raz Pagoli/Bambo Radyo-Baguio