Psychosocial health crisis hotline inyussuat ti ospital ti LU

Headlines

SIUDAD TI SAN FERNANDO, La Union – Inyussuat iti nabiit ti Caba District Hospital (CDH) iti Psychosocial Health Crisis Hotline daytoy. Iti ospital ket maysa kadagiti lima a district hospital nga patartarayen ti gobyerno ti probinsia ti La Union. Iti hotline ket paset ti mental health program ti ospital nga mangipaay iti tulong kadagiti tattao nga addaan iti psychosocial ken mental health conditions, nangruna kadagiti tattao nga agpeggad nga agpakamatay.

Dagiti kliente ti ospital nga mangala iti serbisio ti CDH ket maikkan iti psychological first aid babaen ti telepono. Arapaap iti programa nga pabilegen iti healthcare provider network babaen iti referrals iti saba-sabali nga ahensia nga makaited iti espesipiko a serbisio ti salun-at ti isip ken gibusan wenno pabassiten ti bilang iti depresion wenno kaskaso ti panagpakamatay iti probinsia.

Mabalin a dumawat dagiti agkasapulan iti tulong nga umawag wenno ag-text iti CDH Psychosocial Health Crisis hotline numbers 0912-555-9918 (Smart) ken 0956-481-7840 (Globe). Mailimed wenno agtalinaed a kompidensial dagiti kaskaso.

Kabayatanna, iti Department of Health – Ilocos Center for Health Development (DOH-CHD1) babaen iti Mental Health Program daytoy ket mangipaay met iti pareho a tulong kadagiti tattao nga agkasapulan ti tulong para ti mental health wellness. Kinuna ni Medical Officer IV Magnolia Brabanten chief iti Mental Health Program ti Department of Health Region 1 (DOH-CHD1), nga iti mental health ket kas kapateg ti pisikal a salun-at.

Para kadagiti agkasapulan ti serbisio, intandudona ti hotlines nga 09618151416 (SMART) ken 09454914447 (Globe). Dagitoy nga hotlines ket sidadaan manipud 8:00 a.m. agingga 5:00 p.m., Lunes angingga Biernes.

JPD-PIA LU/PMCJr.-ABN