Pulitika latta piman Part 2

Opinion Sirmata ken Tagtagainep ni Mang Gusting

Naimbag nga oras yo amin kakaarruba, kakabagyan kakayong ken aminen a mangtartarabay iti kolum tayo ditoy ABN. Adda kami manen nga umay umabrasa kadakayo ket namnamaenmi ken ikarkararagmi a sapay koma ta napia kayo latta a kanayon a sangbayan toy kulom tayo. Kumusta, mag-an kayo amin nga awan labasna. Nagasat nga aldaw kadakayo nga awan malabsan, sukimi.

Kalpasan dagiti naglablabas a didigra wenno kalamidad, makunatayo a naka-survive tayo met laengen malaksid kadagiti napukawan iti patpatgen iti biag ken sanikua ken pagtaengan. Kuna dagiti managpaliiw, nakapungtoten ti Nakaparsuaan. Ngem, awan sabali a pabasolentayo no saan a datayo met laeng ta ditay kinailalaan kunatayo ngarud ti nakaparsuaan a parabor ti Managayat unay a Dios. Mismo a datayo met laeng ti nangrames wenno nangidadanes. Kangrunaan ti amin, saantayo a malapdan no dayta ti pagayatan ti Apo tapno mariingtayo iti nagbiddutan tayo.

Ngem, iti sabali a bangir, kakayong, nakas-ang a panunoten adayo pay laeng ti panawen ti kampania para iti mid-term election a maangay inton umay a tawen, makapadanagen … sabali daytoy a didigra ta kinaranggas wenno kinasairo ti tao. Ta ne, manun ti nakaam-ames a krimen a napasamak a maipagarup nga adda pakainaiganna iti pulitika wenno election related crime a kunada. Adda bise mayor a natambangan, daytoy ket napasamak it probinsia ti La Union. Makapadanag dagitoy kaarruba, gapu laeng iti panagtarigagay a makatugaw wenno agbalin a lider iti masakupanda saandan a mabuteng a pumatay wenno agbasol iti maysa kadagiti bilin ti Dios a dika mamapatay.

Mortal a basol daytoy ket ania ti serserbina a sikanto ti maipatugaw no adda met mangal-al-alia kenka gapu iti inaramidmo wenno pinaaramidmo. Dagitoy a didigra ti maysa a kakas-angan ta aramid ti padam a tao a gamrud. Nasaksakit manen nga awaten daytoy ta gapu’t kinaranggas. No apay nga adda ti kakastoy kaarruba. Malaksid kadagitoy a krimen a mainaig iti election wenno basingkawel, adu pay dita ti gumastos iti minilion tapno makatugawda laeng. Ngem, saanyo kadi a mapanunot a nagdakkel ti gastos ti maysa a kandidato ngem mamunto laeng ti sueldona? Kasanuna a subboten? Saanka kadi a makaangot iti nagelgel a baraniw a kunada, Kayong? Nupay saan nga amin ket addaan narudit a gagem ngem adu ngarud metten ti napaliiw tayo. Manu laeng ti sueldo ti maysa a gobernador, congressman wenno mayor. Ngem nagdakkel ti gastosenda iti tiempo ti kampania… salbag ni ayat a kunada Manang Mayyang, adu ti ma-mildred a kunada no dumtengen ti panawen ti basingkawel.

Naimbag laengen ta ditoy batugmi a langit ket natalna ti election, uppaten a dekada ti kaadda tayo ditoy ngem, awan pay napuotak a nagpipinatay gapu laeng iti election nupay addansa met nagdinnanogan idi a napuotan tayo no ditay mariro ken makabawan, hehee. Ay ina, maris kusina a biag, saantayo met ketdin a masdaaw ta addanto pay aggiginnura nga agkakabsat gapu laeng iti pulitika. Agingga’t malpas ti eleksion, manu ngata pay ti matay, kailian?

Sus nalpas ti ani…anak ti tukling a balo, kasta pay kakayong ta ne, overtime tayo manen ket…ala, aglisi ka man dita Atong. Ania man ta isensenyasmon, anunsio iti hueteng? Agingga ita, dayta pay laeng ti ubram, ala, ala, kalagem man ngarud tay opisyal a kasla agtiwel nga aso, hahahaha. Kasta pay, babayoo, tsup tsup muahmuah.