Rebelde, nagsurender iti La Union
CAMP DIEGO SILANG, LA UNION – Simmuko ti maysa a kameng ti New People’s Army (NPA) kadagiti otoridad kalpasan a guyuguyen daytoy ti asawana nga agawiden.
Binigbig ni Senior Superintendent Genaro Sapiera, La Union police director, ti nagsurender a rebelde kas “Braga”, 43, kameng ti Squad Uno, Kilusang Larangang Guerilla (KLG) iti Chadi Molintas command nga addaan operasion kadagiti nagbeddengan ti Benguet, Abra, Mountain Province, ken Ilocos Sur.
Ni Braga, a nangisuko iti armas na nga 12 gauge Shotgun, ket naiparang kadagiti miembro ti media kabayatan ti press briefing idi Mayo 9, 2018 iti Barangay Carlatan, San Fernando City, La Union.
Kinuna ni Sapiera a nagsurender ni Braga kalpasan ti nagsasaruno nga “peaceful negotiations”.
Ni Braga ket binayabay dagiti bunggoy ti Provincial Intelligence Branch, Naval Intelligence Security Group-Northern Luzon (NISG-NL), La Union Provincial Mobile Force Company, Regional Intelligence Division-Police Regional Office 1, Regional Mobile Force Battalion 1, Regional Intelligence Unit-1, 73rd Military Intelligence Company, Philippine Army , S2, 81ST Infantry Battalion, Philippine Army ken 300 Air Intelligence Security Group, Philippine Air Force (ASG,PAF).
Innayon ni Sapiera nga amin a rebelde a sitatallugod nga agsurender ket maikkan iti tulong babaen ti programa ti gobierno a Comprehensive Local Integration Program (CLIP) nga ipatpatungpal ti Department of Interior Local Government (DILG), PNP ken AFP, ken dagiti provincial social welfare and development offices.
Kinuna ni Sapiera a manipud idi indeklara ti militar ken pulis nga insurgency free ti La Union ket addan ti 10 a dati a rebelde a simmuko ita a tawen. E.BELEO / ABN
Bahay ng magsasaka, nasunog dahil sa LPG
May 12, 2018