Salubungin natin ang Bagong Taon na di-pakakampante

December 26, 2021 Editorial

Isang taon na naman ang lilipas, at sa loob ng dalawang beses ng pagpalit ng taon ay nananatili pa rin ang mga konsepto gaya ng “lockdown”, “mandato sa face mask”, “social distancing” at iba pa na nang una’y tila banyaga sa marami sa atin.
Ngayon ang mga ito’y naging bahagi na ng ating araw-araw na lenguahe habang ang pandemya ng Covid-19 ay nagpapatuloy na nakakaapekto sa lahat ng aspeto ng ating buhay.
Hanggang nitong Disyembre 20, 2021 ay nakapagtala na ang Pilipinas ng 2,837,730 kabuuang bilang na tinamaan ng Covid-19; 50,784 ang namatay at 2,777,354 ang kabuuang gumaling. Nakapagtala sa araw na ito ng isa sa pinakamababang bilang ng bagong kaso mula noong Mayo 2020 na 263 lamang.
Naging banta ang pagdaluyong ng mga kaso mula Hunyo ng taong ito dahil sa paglitaw ng itinuring na pinakamabagsik na variant – ang Delta variant.
Muntik na tayong ihambing sa bandang India sa dami ng kaso natin, subalit sa muling paghihigpit ng gobyerno at ang walang humpay na pagsasagawa ng mga akmang pamamaraan at ang unti-unti nang pagdami ng mga nabakunahan at ang pagdating ng sunod sunod na suplay ng iba’t-ibang bakuna ay naampat ang pinangangmbahang patuloy na pagdami ng mga kaso.
Dahil sa magandang bilang ng mga kaso ay ibinaba na ng gobyerno ang mga kategorya ng restriksiyon sa NCR at ibang mga probinsiya at lungsod. Dahil dito lumuwag-luwag na rin ang paggalaw ng mga tao, unti-unti na ring nagbukas ang mga negosyo at transportasyon bagaman may limitasyon pa rin porsiyento ng mga pinapayagang bilang ng mga tao. Pinayagan na rin ang limitadong “face to face” na klase sa mga piling paaralan sa iba’t-ibang lugar ng bansa.
Inilarawan ang responde ng Pilipinas sa Covid-19 bilang isa sa pinakamatagal at pinaka mahigpit na lockdown sa buong mundo. Ipinatupad din ng gobyerno ang sobrang higpit at malupit na pamamaraan sa giyera nito laban sa Covid-19 na pinupuna at binabitkos.
Subalit ginawa ito dahil sa mga pasaway at nagtagumpay naman at sa katunayan ay tinatamasa na natin ang maliit na bilang ng mga kaso napaluwag at bumuti na rin ang mga kalagayan ng mga ospital.
Mukhang magkakaroon tayo ng masaya at medyo normal na pagdiriwang ng Kapaskuhan at positibong pagsalubong sa taong 2022 dahil sa medyo kumalma na ang padgami ng mga kaso, ngunit sa kasamaang-palad ay may nagbabanta na namang bagong variant na sinasabi ng mga eksperto na mas mabilis makahawa kaysa Delta variant.
Sa ngayon ay may naitala nang tatlong kaso ng Omicron sa bansa at siniguro naman ng mga awtoridad sa kalusugan na walang dapat ikabahala.
Bagama’t nakakapanatag ang pahayag na ito ay kailangan pa rin nating mag-ingat at mapagmasid dahil ayaw na nating maulit ang pagsalakay ng mga naunang variant, huwag na nating hayaang kalabitin pa tayo ni Omicron – magsaya tayo sa Bagong Taon subalit huwag pakakampante. Manigo at ligtas na Bagong Taon sa ating lahat!