SONA ni Digong, ano kaya ang laman?

July 22, 2017 Daplis Walang Mintis Opinion

Malaking palaisipan kung ano ang lalamanin ng ikalawang SONA (State of the Nation Address) ni Pres. Duterte bukas. Samut-sari na ang mga hula sa mga huntahan. At meron pa ngang nagpupustahan na, eh. Na ano? Papaano ang pustahan? Kung magmumura daw ba o hindi si Digong. Mas marami raw ang pumustang magmumura. Tsk tsk, sa ganang amin, marami ang mananalo. Kailan ba naman nagsalita ang pangulo sa isang pagtitipon na hindi nagmura o hindi nagpahapayaw? Katauhan na niya ito at siya’y tao lang na may karapatang magsabi ng gustong sabihin. Lumalaki kasi ang isyu kapag sinakyan ang kanyang mga pangiliti lalo pa ng mga taong hindi pinagtampuhan ng ngiti, mga tao raw na walang kiliti.

******
Sa personal na panayam ng Tambalang Edong Carta at Jimmy Luzano ng Z-Radio kay Sec. Martin Andanar kamakailan, baka raw mas mahaba ang ikalawang SONA ni Digong kumpara sa nauna. Kasi nga naman daw sa dami ng accomplishments nito sa loob lamang ng isang taon. Sabi nga ng marami: parang accomplishments na ito sa loob ng dalawa o tatlong taon ang kalipunan ng mga nagawa ng pangulo. At dahil dito, ika ni Sec. Andanar, malamang na may kahabaan ang speech. Ang masaklap kung hindi babasahin (na naman) ni Digong ang kanyang script at babanat  na ang kanyang adlib. Tiyak na hahaba nga ang SONA. Mas kinalulugdan kasi ng madlang people ang kanyang mga adlib o pahapyaw dahil lumalabas dito ang tunay niyang saloobin maski may kahalong mura. Aba’y kung totoo nga naman, bakit di niya ibubulgar? Mahirap ang maligoy. Deretsahin mo na, pards.

******
Sabi nila, tiyak na ang pangunahing lalamanin ng SONA bukas ay ang programa kontra illegal na droga. Mabunga ito dahil tambak ang mga nakumpiskang droga, sandamukal ang mga sumuko at naaresto, at marami-rami rin ang nasa 6 feet below the ground. Katunayan, dahil sa kampanya kontra droga, may senador pang nakulong bagamat tuloy pa rin daw ang drug trade sa Bilibid kung saan idinadawit ang senadora. Tiyak ibibida rin ng pangulo ang kanyang nagampanan sa paglilinis sa iba’t ibang ahensiya ng pamahalaan lalo na sa mga markadong may kakurakutan. Katunayan nga, ilang appointees niya mismo ang kanyang sinibak dahil sa palpak na trabaho. At siyempre, bida ang kanyang kampanya kontra  terorismo at kriminalidad. May negatibo mang mga kumento, kita naman ang suporta ng mas nakararamia. Ang ebidensiya ay ang resulta ng pinakahuling survey ng Pulse Asia kung saan, tumaas hanggang 82% ang approval ratings niya at 81% ang trust rating. Yan si Pres. Duterte. Hindi natinag sa mga batikos lalo na hinggil sa idineklarang Martial Law.

******
Habang sinusulat ang espasyong ito, may sulat na sa Kongreso si Digong hinggil sa isyu ng ekstensiyon ng batas military. Gusto ng pangulo na ma-extend pa sana ang Martial Law hanggang Dec. 31, 2017 dahil marami siyang dapat gawin para sa mas matatag na Mindanao. Kung ito ay mapapaboran, abangan. At balik-SONA tayo kung saan ang tiyak na bidang laman ay ang nagaganap ngayon sa Marawi kung saan tumataas pa rin ang bilang ng casualties o namamatay sa panig ng terorista, gobyerno at sibilyan. Sabayan na lang natin  ito ng taimtim na dalangin na sana’y matapos na ito at di na mangyayari sa iba pang lugar sa Mindanao at bansa. Mabuhay ka Sir Digong!