Truck ban ng Baguio, tinutulan ng Benguet gov

May 21, 2017 Opinion

LUNGSOD NG BAGUIO – Nakiusap si Benguet Governor Cresencio Pacalso sa mga opisyal ng lungsod na pigilan muna ang pagpapatupad ng ordinansa ukol sa truck ban upang maiwasan ang pagkitil sa kabuhayan ng mga magsasaka sa probinsya.
“I talked to Mayor (Mauricio) Domogan this week and he said he has ordered the city police to hold the implementation of the truck ban ordinance,” ani Pacalso.
Kamakailan ay inaprubahan ng Baguio City council ang Ordinance 50 series of 2017 na nagbabawal sa mga heavy equipment, trailers, dump trucks at iba pang freight trucks o six-wheeler trucks at mas malaki pa na lumalagpas sa kabuuang timbang na 4,500 kilograms na bagtasin ang ilang pangunahing kalsada ng lungsod mula ika-6 hanggang 9 ng umaga at ika-4 ng hapon hanggang ika-9 ng gabi.
Sumang-ayon ang truckers sa total truck ban mula 6am hanggang 9am ngunit umiling ang mga ito sa truck ban mula 4pm hanggang 9pm, na anila ay oras ng pagbiyahe ng mga gulay mula sa trading posts sa probinsya ng Benguet patungo sa Metro Manila at iba pang merkado sa bansa.
Ayon sa truckers, pinakamatindi sa kanilang pagbiyahe ang 2pm hanggang 6pm upang umabot sa 6pm hanggang 8pm na truck ban sa La Trinidad, kaya hinihiling ng mga ito sa lokal na gobyerno na huwag saklawin ang kanilang mga truck na may kargang perishable goods sa ipinapatupad na truck ban sa Baguio.
Ipinaliwanag ni Pacalso na kailangang magkaroon ng pagkakatugma sa magkaratig na local government units ng Baguio at Benguet. Ang Baguio ay naliligiran ng mga bayan ng Benguet kung saan kinukuha ang mga gulay at bulaklak na ibinibenta sa Metro Manila at iba pang bahagi ng bansa.
Nauna nang naiulat na tinatayang 80 porsyento ng highland vegetable requirement ng Pilipinas ay nagmumula sa probinsya ng Benguet.
Ayon sa gobernador, malaki ang epekto ng truck ban sa mga magsasaka dahil ang mga bulaklak at gulay ay hindi makakaabot sa mga trading areas sa Metro Manila sa oras kung kailan bumibili ang mga traders. Ibig sabihin, kailangang maghintay ng isa pang araw upang mabili ang mga naturang produkto na madaling masira.
“There are specific hours in Metro Manila when trucks are allowed to traverse the roads, they are catching up with the buyers and are also catching up with the cargo ships so they cannot delay their transport,” saad ni Pacalso.
Aniya, ang pagkaantala ay nangangahulugan din ng mas mataas na presyo ng gulay sa Metro Manila at pagkalugi sa bahagi ng mga magsasaka ng Benguet, kasama na ang truckers.
Sinabi ni Pacalso na iniutos ni Domogan sa kapulisan na pansamantalang itigil muna ang pagpapatupad sa ordinansa habang hinihintay ang kumpirmasyon ng city council sa administrative order ng alkalde na nagbibigay ng exemption sa truckers ng mga pangunahing produkto at serbisyo at ang pagpapatibay sa amendatory ordinance ni Bise Mayor Edison Bilog. Liza T. Agoot/ PNA / ABN