Umdas a suplay ti bagas para Ilocos Region impasigurado ti NFA

May 9, 2020 Headlines

SIUDAD TI SAN FERNANDO, La Union – Impasigurado iti National Food Authority (NFA) Ilocos ti publiko nga adda umdas a suplay ti bagas tapno mapunuan iti kasapulan a taraon iti intero a rehion iti tengnga ti quarantine gapu ti coronavirus disease 2019 (COVID-19).
Bayat iti Kapihan sa Ilocos ti PIA idi Lunes, tapno maepep iti panagdanag ti kinakurang ti bagas, kinuna ni Yolanda Navarro, regional director ti NFA-1 nga umdas iti suplay iti bagas nga taraon iti intero a rehion para iti 16 aldaw maibasar iti kasapulan nga inaldaw a konsumo.
Kinunana pay nga iti kasapulan nga inaldaw a konsumo ti intero a rehion ket 45,820 sako iti bagas karaman iti Abra ken Benguet.
Ngem, inulit ni Navarro nga saan nga amin a suplay ti bagas iti kumonkunsumo a publiko ket naggapu iti NFA nga iti sabali a suplay ket manipud kadagiti pribado nga agtagtagilako.
Maysa pay, kuna ni Navarro nga agtul-tuloy iti panagkiskisda ti palay tapno masigurado iti natalged a produksion ken kamaudiananna maiwaras kadagiti saba-sabali a local government units (LGU), iti Department of Social Welfare and Development (DSWD) ken dadduma pay nga opisina ti gobierno.
Imbagana nga agtul-tuloy nga supsuportaran ti NFA dagiti LGU, DSWD, mammanday linteg ken dadduma a sector ti gobierno iti rehion babaen ti panagiwaras iti saksako ti bagas tapno matulongan dagiti relief operationsda.
“Iti Rehion 1, imbunongmin iti agadup 181,827 sako ti bagas kadagiti saba-sabali nga LGUs, DSWD, mammanday linteg, ken dadduma pay a sector,” kinunana.
Kabayatanna, inlawlawagna nga iti sidong ti Rice Tariffication Law, nasken nga agtalinaed iti mandato ti NFA iti buffer stocking nga addaanda iti umdas nga stock iti bagas nga katupag iti 15-30 aldaw nga mabalin nga mausar laeng iti panawen ti emergencies wenno didigra.
“Iti dayta, bayat nga sangsanguen tayo iti krisis ti salun-at, insardengmi pay ti panaglako iti NFA nga bagas kadagiti accredited retailers ken inreserba daytoy para kadagiti LGUs ken dadduma nga ahensia ti gobierno para ti relief operationsda,” kuna ni Navarro.
Kasta met, impakaammo ni Navarrro nga gumat-gatang iti NFA ti ani nga irik manipud mannalon iti rehion iti presio nga PhP19.00 kada kilo, nadalus ken namaga.
Kasta met, bayat iti Laging Handa Network Briefing idi Martes, binigbig ni Mayor Trina FirmaloFabic ti Odiongan, Romblon iti suporta nga inted iti nadumaduma a national government agencies nga nangted tulong kadagiti amin nga LGU iti naipanpanawen nga programa ken proyekto nga pudno nga nangep-ep ti rigat dagiti kaaduan nga kailianda nga naapektaran ti pandemia.
Adtoy ti sumagmamano, Plant, Plant, Plant a programa iti Department of Agriculture nga panggep daytoy nga maingato iti lebel ti kinaumdas iti taraon ti pagilian, ken kasta met suporta nga panangited ti NFA iti bagas kadagiti nadumaduma nga LGUs tapno matulongan ti relief operation da.
“Nakikipagtulungan naman ‘yong ating national government agencies along with the provincial government, office of the congressman, and all LGUs at nakita naman natin ‘yong tulong na ipinaabot galing sa ating President pababa sa lokal na pamahalaan,” kuna ni Fabic iti pagsasao nga Tagalog.
Iti Network Briefing nga idanguluan ni Presidential Communications Operations Office Secretary Martin Andanar, ket inaldaw nga maibrodkas manipud 8 a.m. agingga 9 a.m. ti Radyo Pilipinas ken mabuya met iti regional ken provincial Facebook pages ti Philippine Information Agency iti intero a pagilian.
JTQ-PIA1/PMCJr.-ABN