Unay ti tiemponan Kayong!

October 14, 2017 Opinion Sirmata ken Tagtagainep ni Mang Gusting

Halooo! Naimbag nga oras tayo amin kailian, Kayong Angkuan. Mag-an tayo kadagiti batug tayo a langit…no dakami met ti kas yo damagen, adtoy nga aggur-uray latta iti manabtuog a kunada bareng no adda met la dumteng a pagsayaatan, hehehee. Kumusta met ti biagtayo ita kakayong ket ne, ania itan daytoy a paniempona, Oktobren ngem, apay ngay daytoy nga edad, ita laeng a napuotak a kastoy. Agasem ta agtodo, agtodo lattan…unayen ti kastoy a tiemponan!

Apow, ania itan ngay, kasla ti agsimpa ti panunot no kastoy laeng. Kasano ngay tay kagapgapasen ni Kayong Angkuan ta mato-duanen. Kasanu ngatan tay irik ni ikit Huana iti kalsada no bigla lattan nga agarbis ken agtodo a dina oras. Wen, Kakayong, dakkelen ti nagbalbaliwan ti paniempona sipud nadlaw ti ibagbagada a global warming ta apektado ti makuna a climate change, dakkel a panagbaliw ti klima gapu iti ibabarada ti lubong. Kasanu, sulpeng tayo met, no ania ngamin ti maiparparit nga intay aramiden, isu met ti pagaayat tayo. Kalpasanna no adda mapasaran tayo a didigra, pabasolen tayo ti Namarsua. No di ket am-ammikok kayo hahaha.

Awanen ti makuna a nanakman a mangisakit iti kinangayed ti nakaparsuaan a sagut kadatayo ti Apo a Mannakabalin amin. No ditay ket… hay, Apo, makasao tayo man iti espanyol a kunadan. Kasano, uray dagiti agtuturay ken opisyal tayo ket pasigda a mokong, awan man laeng ti makuna a mangisakit iti nakaprsuaan ta kasanu, dayta laeng agpipinniltak iti buyok ti ammoda. Sal-ot dagitoy a senatong este senador kasta met dagiti tongresman este congressman tayo, imbes nga agpanday iti linteg a mangipaay iti pagimbagan tayo nga umili, no ania ketdi dayta as-asikasuenda. Her-hearing dita, hues da aya, ta—ay ina…makasao tayo manen a kunak. Agburek manen ti royal blood tayo no kastoy.

No koma ti panunoten da ket no kasano a mapasayaat ti aglawlaw, pannakaisubli ti kinangayed ti nakaparsua-an tapno makaay-ayo nga intay pagnaedan. Presko ti intay angsen nga angin saan ketdi nga asuk, sus maria kusina, no panagkakampania nagpipintas dagiti kampaniada porke makakalikasan wenno ania pay dita, inton malpasen ket nakatugawdan awanen… ayandan dagitay karkarida.

Isu a kastoy, inton adda didigra pabasolenda ti Namarsua. Dida koma amirisen no ania ti naglablabesan ken nagkuranganda kas umili wenno opisyal.Tunggal maysa kadatayo adda ti makuna a pasetna iti panagbara ti panawen ken panagbaliw ti paniempona. Ibagada la ngaruden a maiparit ti agpuor ti basura ken agpukan iti kayo. Imbag koma no ammo tayo ti agmula iti kayo. Ta no tunggal maysa kadatayo a milyon nga umili ket agmula iti uray maysa laeng a kayo di maisubli koma ti kinangayed ti nakaparsuaan ket datayo met laeng ti mairanud. Isu nga awan, ditay masdaawen no kastoyen ti intay mapaspasaran a paniempona kakayongko ida.

Sus Kakayong, daytan, naimasan tayo manen ti nagsasarita. Nalipatak manen tay pagatang ni Sofing a manteka. Dakesen, amangan no umaynak manen suroten iti binalsig. Ala, kastan , ket sika met Atong, saanka man nga agsalisali dita. Ania manen aya ti masapul mo, amm…ikkanka iti kalagem a tayaam? Pues, kalagem tay masikog a sarampiting. Ala, babayo, tsuptsup muahmuah.