WCPD TI PRO-1 PINAREGTANA ITI LABAN KONTRA PANANGRAMES

October 10, 2022 Headlines

Ilocos Region – Pinapigsa iti Women and Children Protection Desk (WCPD) iti Police Regional Office 1 (PRO- 1) iti laban daytoy maikontra iti panagraira iti insidente dagiti panangrames iti rehion ti Ilocos.
Sigun kenni PMAJ Monette Balderas, hepe iti PRO- 1’s WCPD, agtalinaed a natibker iti grupo nga ararmidenda iti amin a pamuspusan tapno masumra iti pannakapasamak iti genderbased violence (GBV) iti rehion, kangrunaan iti panangrames, kas ipakpakita iti estadistika ti krimen nga kasaknapan iti GBV
nanipud 2020 agingga ita sadiay Rehion 1.

Idi 2020, agdagup 542 a kaskaso iti panangrames iti naireport iti rehion; 482 a kaskaso idi 2021; bayat nga
agingga Agosto 2022, addan 267 a kaskaso iti nairekord. Imbaga ni Balderas a maibasar iti panangtingitingda, dagiti ubbing a babbai nga agtawen 13 agingga 17 a maibilang iti lower socioeconomic
class iti gagangay unay a biktima iti panangrames. “Ipakita iti datos nga isuda iti masansan a biktima iti
panangrames dagiti nagbasol a karaman iti 18 agingga 25 a grupo ti tawen a naduktalan nga awanan trabaho, ken daksanggasat, kaaduan kadagiti kriminal ket am-ammo dagiti biktima,” kuna ni Balderas.

Dagiti makuna a krimen ket kanayon a maar-aramid kada aldaw iti Sabado ken Lunes iti baet ti alas otso iti
rabii agingga tengnga ti rabii. Iti nasao a panangtingiting, panggep iti WCPD ti PRO-1 a mangkonduktar kadagiti dialogo, lektiur, ken seminar a dagiti puntirya a makipaset ket awanan trabaho a lallaki. Maysa pay, ikagumaan iti grupo a mangipasdek iti nasaysayaat a pannakainaig ken pannakikappon kadagiti
local government unit tapno mapabileg dagiti babbai ken ubbing babaen iti panangkonduktar iti panagsanay iti pamunganayan a panangidepensa iti bagi, kasta met iti panagadal iti responsible a panagpamilia.

Iti pangkaaduan, agtultuloy nga ipapas ti WCPD iti PRO-1 iti amin a yunitda para iti nalawlawa a panangiwaras iti impormasion babaen kadagiti polis a mangibunong iti flyers kadagiti terminal ti jeepney ken tricycle, wenno babaen iti pangbalaybalay a panangsarungkar tapno tumulong iti panaglapped ti
GBV. Kabayatanna , inanamongan iti nabiit pay iti Regional Inter-Agency Committee Against Trafficking
– Child Pornography (CP) – ken Violence Against Women and Children (VAWC) Ilocos iti Strategic Plan para iti sumaruno a dua a tawen a mayangkla iti maingato iti pannakaammo maipapan kadagiti linteg a mangsalaknib kadagiti nakapoy a sektor manipud trafficking, CP, ken VAWC, kasta met ipakaammo iti
umili maipapan kadagiti programa ken serbisio a mabalin a magun-od dagiti nakalasat a biktima.

(CGRC, PIA Region 1/PMCJr.-ABN)