12-anyos na babae, ginahasa sa Apayao

August 27, 2017 Headlines

LUNGSOD NG BAGUIO –  Nang nakakuha ng lakas  ng loob ay matapang na inihayag ng isang 12 anyos sa pulis ng Apayao ang panggagahasa sa kanya.Kasama ang isang barangay kagawad at kanyang ate ay nagpunta sa himpilan ng pulis ang Grade 7 na biktima noong Agosto 22.
Isinalaysay nito kung paano ito ginahasa ng 29-anyos na karpinterong kinilalang si King Rivera noong Hunyo 2017 sa barangay Imelda, Sta Marcela, Apayao.
Napag-alaman ng pulis na pagkauwi ng batang biktima mula sa paaralan ay nadatnan sa kanilang bahay ang suspek na kaibigan ng kanyang ama. Sinundan umano ng suspek ang bata nang nagpunta ito sa kusina. Sinuntok ng suspek sa tiyan ang biktima kaya nawalan ito ng malay.
Nang magising ang biktima ay nakahubad na ito sa loob ng kanyang kwarto.
Sinabi ng bata na sa takot niya ay hindi siya nakapagsumbong sa kahit na sino dahil lagi siyang sinusundan ng suspek.
Nang nagkaroon ng pagkakataon ay nagsumbong ito sa kanyang ate na siya namang nag-ulat sa mga opisyal ng barangay at sinamahan ng mga ito ang biktima sa pulis.
Ang naturang insidente ay naganap dalawang linggo lamang matapos na iniulat sa otoridad ang isang tanod sa Conner, Apayao na nag-molestiya ng isang 10 anyos na babae at nanggahasa ng 8 anyos.
Ang Barangay Peace Action Team (BPAT) member na si Bobby Cudiyen, 47, mula sa Ili, Conner, Apayao ay tinutugis pa rin ng otoridad para papanagutin sa panggagahasa sa 8-anyos na batang babae sa isang mapunong lugar noong Agosto 2015 sa Baricawen.
Hinipuan at hinimas din umano ni Cudiyen ang ari ng isa pang 10 anyos na batang babae na itinawid nito sa kabilang bahagi ng ilog noong Oktubre 20, 2016. ACE ALEGRE / ABN