Forum iti pederalismo, naisayangkat iti LU

August 27, 2017 Headlines

SIUDAD TI SAN FERNANDO, LA UNION – Insayangkat ti Partido Demokratiko Pilipino-Lakas ng Bayan (PDP-Laban), a partido ni Presidente Rodrigo Duterte, ti maysa a forum ken konsultasyon maipapan iti pederalismo idi Agosto 24, 2017 sadiay ili ti Agoo ken ditoy a siudad.
Dua nga speaker manipud Federalism Institute ti nangidaulo iti nasao a pagteng a nakipasetan dagiti opisial ti nagduduma nga ili ken siudad ti La Union.
Inyebkas ni Gobernador Francisco Emmanuel “Pacoy” R. Ortega III ti naan-anay a suportana kadagiti adbokasia ken panangiturong ni Presidente Duterte iti pederalismo a panangimaton iti gobierno.
Nakuna ti gobernador nga iti agangay ket pagimbagan daytoy ti probinsia ken makatulong daytoy tapno magun-od ti arapaap ti La Union kas “Heart of Agri-Tourism in Northern Luzon by 2025”.
Inlanad ni Prof. Tetchie Aquino ti primer wenno kartilia ti pederalismo. Inlawlawagna dagiti pagsayaatan ken pakaidumaan ti kastoy a gobierno manipud iti agdama a gobierno. Impaganetgetna pay ti pagimbagan no mabalbaliwan ti madama a modelo a nakasentro iti Manila tapno agpapada a mapadur-as ti sabali pay a paset ti pagilian.
Ni Prof. Jonathan Malaya ti nangiparang iti modelo ti pederalismo ti PDP-Laban.Impanamnama ni Malaya a ti panagsukat ti wagas ti panagturay ket maadal a nalaing ken maala ti kapanunotan dagiti umili iti amin a paset ti pagilian.“The rich regions will become richer while the poor regions will become poorer if we do not change,” kinunana.
Nagyaman ni Bise Gobernador Aureo Augusto Q. Nisce kadagiti palawag ti dua nga speaker bayat a sinuportaran met da Sangguniang Panlalawigan Members Reynaldo M. Mosuela ken Manuel Victor “Mannix” R. Ortega Jr. ti panagbalbaliw ti wagas ti panagturay.
Kayat ni Presidente Duterte a masukatan iti pederalismo ti agdama a wagas ti turay sakbay a malpas ti terminona. Mamati daytoy a ti pederal a gobierno ti mangted ti agpaut a maisagutna kadagiti dumteng pay a kaputotan ken mangyababa iti dumakdakkel a regkang iti nagbaetan dagiti nababaknang ken marigrigat iti Pilipinas. Maysa pay daytoy a pamay-an tapno malpasen ti riribuk idiay Mindanao.
Ti PDP-Laban Federalism Institute ket maysa a politikal a pangen dagiti eksperto nga idadauloan ni Senate President Aquilino “Koko” Pimentel III. Daytoy ti mangad-adal ken mangsagsagat iti adbokasia a pederalismo tapno maitutop kadagiti kasapulan ti pagilian. MARCEL A. FLORENTINO, PITO-La Union / ABN