17 NPA, sumuko sa Cagayan, Apayao

February 17, 2018 Headlines

LUNGSOD NG BAGUIO – Umabot sa 17 mga miyembro at supporter ng Communist Party of the Philippines-New Peoples Army ang boluntaryong sumuko sa magkasamang pwersa ng military troops at ng local police ng Rizal, Cagayan noong Pebrero 11, sa ulat ng Division Public Affairs Office (DPAO) noong hapon ng Pebrero13 .
Ayon kay DPAO Chief Captain Jeffrey Somera, ang mga rebelde ay sumuko sa 17th Infantry Battalion (17th IB) sa ilalim ng 5th Infantry Division (5ID) at ng local police ng Rizal.
Ang 17IB ay sakop ang mahigit limang barangay ng probinsiya ng Apayao sa Cordillera at ang buong rehiyon ng Cagayan Valley.
Ani Somera, ang pagsuko ay pinangasiwaan ni Rizal Vice Mayor Joel Ruma.
Kinilala niya ang mga sumuko na residente ng Barangay Masi, Rizal, Cagayan. Aniya, sa 17 na sumuko, tatlo ay kaanib ng Militia ng Bayan (MB).
Ayon kay 17IB Commander Lieutenant Colonel Camilo Saddam, ang mass surrender ay iniugnay sa agresibong information dissemination ng programa ng pamahalaan upang tulungan ang mga rebelde at kanilang mga supporter na muling tanggapin ang batas at tulungang mamuhay nang payapa.
Isiniwalat ni Somera ang pahayag ni Saddam na nagsasabing ang residente sa lugar ay inihahayag na ang mga pangalan ng kanilang kasamahan.
“We expect more batches of surrenderers in the coming days, since the first group had already convinced their relatives to surrender as well,” aniya.
Sa pahayag ni Brigadier General Perfecto Rimando Jr., 5ID commander, pinuri nito ang pagsisikap ni Vice Mayor Ruma sa pagtulong sa kaniyang mga nasasakupan sa tamang landas.
“In our effort to finish the insurgency and terrorism in our country, what we need are government officials and people who have the courage to stand for righteousness, just like Vice Mayor Ruma,” ani Somera.
“The support of the local government units to our focused military operations is really a big factor in legitimizing our action on the ground,” dagdag niya.
Noong mga nakaraang araw, limang militiamen mula sa parehong barangay ang sumuko sa 17IB matapos madiskubre ng government troops ang malaking kampo ng mga rebelde hindi kalayuan sa parehong barangay. Ang pangkat ng gobyerno ay nakatagpo ng halos 10 rebelde bandang hapon ng Pebrero 10, isang araw bago ang mass surrender, sa parehong barangay. PNA / ABN