2,000 trabaho maidiaya iti La Union Mega Jobs Fair

February 17, 2018 Headlines

SIUDAD TI SAN FERNANDO, LA UNION – Agarup 2,000 job vacancies ti agur-uray kadagiti agkasapulan ti panggedan iti mapasamak a La Union Mega Jobs Fair 2018 kas paset ti pannakarambak ti 168th foundation anniversary ti probinsia.
Segun kenni Charito C. Dator, manager ti Public Employment Service Office, maisayangkat ti jobs fair inton Pebrero 20, 8am inggana 4pm iti Father Burgos Gymnasium ti Saint Louis College, ditoy siudad.
“There may be even a higher number of jobs to be offered,” kuna ni Dator.
Manamnama a makipaset ti 50 employers, local ken international, iti job fair tatta a tawen. Dagiti dadduma ket aggapu iti Manila, Pampanga, Baguio, ken Tarlac.
Innayon ni Dator, “Different government agencies will also be there to provide services and cater to queries or concerns from the public.”
Idi napalabas a tawen, adda pakabuklan a 1,027 a nagrehistro iti La Union Mega Jobs Fair, 107 kadagitoy ti hired on the spot. Dagiti dadduma nga aplikante a naipasidong iti follow-up interviews, exams, ken submission dagiti requirements ket naud-udi a nakastrek iti trabaho. Adda pakabuklan nga 11, 931 trabaho ti indiaya ti 71 employers, kaaduan ket local employers.
Ti maisayangkat a La Union Mega Jobs Fair 2018 ket babaen ti pannakitinulong ti Department of Labor and Employment (DOLE), Philippine Overseas Employment Administration (POEA), ken sabali pay a partner agencies. MPA, PIA-La Union / ABN