P8.2 bilyon tax collection, target ng BIR Cordillera

February 17, 2018 Headlines

LUNGSOD NG BAGUIO – Target ng Bureau of Internal Revenue-Cordillera, na maabot o malagpasan ang layunin na P8.2 billion tax collections sa buong rehiyon ngayon taon.
Ayon kay BIR Acting Regional Director Douglas Rufino, na bagama’t 97% lamang ang kanilang nakamit na tax collection noong nakaraang taon, ay isang malaking accomplishment pa rin ito sa revenue ng pamahalaan at patunay sa masigasig na kampanya ng tax collections sa rehiyon.
Kahapon ay pinangunahan ni Rufino at ng mga empleyado ang kick-off ng kampanya sa nalalapit na filing ng income tax sa Abril 15, kasabay ang paglulunsad ng “Salamat Sa’yo” logo ng BIR.
Aniya, ang “Salamat Sa’yo” ay programa ngayon ng bureau bilang pasasalamat, hindi lamang sa malalaking taxpayers, kundi para sa maliliit na taxpayers din.
“May kasabihan nga, ang isang milyon ay hindi mabubuo kung walang piso, kaya ang logo na ito ay para sa lahat ng ating taxpayers na tumatalima sa mga programa sa ating administrasyon,” pahayag ni Rufino.
Ayon kay Rufino, gagawin nila ang kanilang trabaho para maabot ang target na P8.2 billion tax collections sa pamamagitan ng mga bagong programa na gaya ng series of seminars of information and dissemination sa ilalim ng mga kasaad sa TRAIN Law.
Sa bagong TRAIN Law, ang BIR-Cordillera ay naka-kolekta ng 30 percent sa nakaraang buwan ng Enero, na mas mataas kumpara sa unang buwan ng nakaraang taon.
Aniya, malaking kabawasan din sa koleksyon ngayong taon ang pagtanggal sa ITR (Income Tax Return) mula sa mga minimum wages na empleyado o sumasahod ng P250,000 kada taon, pero ito naman ay mababawi mula sa tinatawag na large taxpayers service sa national office.
Ayon pa kay Rufino, target nilang iseminar ay ang mga small scale miners, lalo na sa lalawigan ng Abra, dahil sa nagdaang limang taon ay malaki ang ibinaba ng pamahalaan sa kita ng gobyerno.
Sa bagong administrasyon, ipinapaalam sa mga minero ng ginto na mula sa dating 5% tax sa pagbebenta ng ginto, maliit man o malaking gramo sa Central Bank ay ibinaba ito sa 1% na lamang.
“Ikinagagalak kong sabihin sa publiko na nitong Enero ay may P1.5 milyon halaga ng ginto ang pumasok sa Central mula sa ating lugar, dahil sa mababang tax na iginawad ng ating administrasyon,” wika pa ni Rufino.
Aniya, ang mababang tax na ito para sa mga minero ay isang malaking hudyat na maingat ang ating eknomiya, lalong-lalo na ang ginto na mapunta sa pamahalaan, kaysa mapunta sa mapansamantalang buyers at dalhin sa ibang bansa.
“Ipinapaalam ko din sa ating mga small scale miner na makakatulong kayo ng malaki sa purchasing power ng ating piso kung lahat po ng ginto ay dadalhin niyo sa ating Central Bank. At sa mababang tax po ngayon ay wala ng dahilan para hindi natin maengganyo ang minero na tumulong para palakasin ang ginto sa ating bansa,” pagtatapos ni Rufino. ZALDY COMANDA / ABN