NTC PAKDAARANNA TI PUBLIKO KONTRA “JOB SCAMS”

April 20, 2024 Headlines

SIUDAD TI VIGAN, Ilocos Sur

Pakdaaran ti National Telecommunications Commission (NTC) ti publiko nga agannad kadagiti panangallilaw wenno online scams nga aramiden dagiti manggundaway iti panagtarigagay ti tao nga dagus nga agkuarta. Impaulog ni NTC Region 1 legal officer Ana Minelle Maningding ti pakdaar bayat iti Ammuentayo radio program ti Philippine Information Agency Ilocos Sur Information Center idi Abril 15. Inlawlawagna nga dagiti “scammer” ket mangipost ti job offers tapno mangallukoy iti publiko ti trabaho a nalaka, saan a kasapulan a gagangay a dokumento ti panagtrabaho, ken mangitukon iti nangato unay a kita wenno sueldo iti apagbiit a panawen.

“One of their schemes is that they ask you to download their application. You will open an account and then ask you to link your e-wallet. Your first task is easy, just like in online shopping, adding items to your cart and fulfilling an order (Maysa kadagiti gakatda ket kiddawenda nga i-downloadmo ti applicationda. Manglukatka ti maysa nga account ken kiddawenda nga i-linkmo ti ewalletmo. Ti umuna a “taskmo” ket nalaka, kas iti panaggatang iti online, pananginayon kadagiti item iti cart-mo ken panangipatungpal iti maysa nga order),” inlawlawagna. Kalpasanna, kiddawen dagiti scammer nga itop-up dagiti biktima dagiti e-walletda, iclick dagiti item, ken kalpasanna, makaawat iti dakkel unay a gatad ti kuarta no idilig iti trabaho nga impaayda.

Segun iti legal officer ti NTC, daytoy ti mangallukoy kadagiti indibidual nga ingato ti investment-da a gundawayanto
dagiti scammer. Kinuna ni Maningding, “Kalpasan ti panagpuonan, saanmo a maluktan ti applicationda ngem ibagada nga awan iti aniaman nga isyu iti sistemada.” “Dikayto makontak ti pannakabagida kalpasan ti sumagmamano a tiempo. Mabatikanto nga awan pannakabalin; awan ti pamay-an tapno maisubli ti kuartam,”
kinunana pay. Imbagana nga dagiti scammer ket usarenda iti maysa a naratibo tapno makipaset ti publiko kadagiti pinarparbo nga estoria ti balligi, ken dagiti peke a permit ti Department of Trade and Industry (DTI).

Tapno maliklikan a matnag dagiti biktima kadagiti scam, impalagip ni Maningding a no ti itukon ket nasayaat unay no pudno, dakkel ti posibilidadna a maysa dayta a panangallilaw. “Awan ti nalaka a pamay-an ti pananggun-od ti kuarta. Diyo dagus a patien dagiti text message ken no ania ti makitam ti online, saan nga ag-click kadagiti link,” inyangawni Maningding. Impaganetgetna met a masapul a laglagipen ti publiko to akronimo a BIRD, a kayatna a
sawen block unknown accounts sending messages, ignore fraudulent messages, report the scams to NTC or the Philippine National Police Anti-Cybercrime Unit, and delete the messages.

(ATV, PIA Ilocos Sur/PMCJr.-ABN)