1M na 4Ps Beneficiaries sa National ID na Rehistrasyon sa taong ito

February 9, 2019 Metro BLISTT

Isang milyong Pilipino ang nakikita ng gobyerno na matatapos sa
kanilang rehistrasyon para sa Philippine Identification System Act (Philsys) ayon sa Philippine Statistics Authority. “We are targeting one million ‘Pantawid Pamilyang Pilipino Program’ (4Ps) for the
first three months of the year to be registered under the national
ID system,” pahayag ni PSA Cordillera Regional Director Villafe Alibuyog. Sinabi niya na magsisilbi itong pilot testing para makita
ng gobyerno ang mga posibleng hamon na lulutang sa panahon ng aktuwal na rehistrasyon ng buong populasyon.
Magiging daan din ito ng gobyerno para makagawa ng pagbabago at agad na magkaroon ng mga solusyon sa preparasyon bago ang
maramihang pagrerehistro.
Sinabi pa ni Alibuyog na nasa proseso na ng pagsusubasta ang pagbili ng ID-making machines habang ang aktuwal na rehistrasyon ay mag-uumpisa pa lamang. “From March to September this will be the procurement period of the equipment we will be needing for the
implementation of the national ID System,” aniya.
Nasa limang milyon pa ang marerehistro hanggang Disyembre 2019 o kabuuang anim na milyon sa taong ito. Ang tutok ay sa mga
naninirahan sa mga liblib na barangay, mga menor de edad, senior citizens, may mga kapansanan at mga katutubong Pilipino.
Sinabi ni Alibuyog na ang Philsys ay isang limang-taon na programa ng pambansang gobyerno at ang PSA ang ahensiyang tagapagpatupad. “The plan started in 2018 and we are targeting to register 06 million individuals until 2023,” aniya.
Nakatutok din sa taong 2024 ang rehistrasyon at pag-isyu ng mga ID sa mga bagong-silang na sanggol. Dahil ipinapatupad na ang Philsys ay nagsasagawa ang PSA ng information dissemination
campaign sa buong bansa.
Ayon kay Alibuyog ang national ID system ay magbibigay ng isang balidong katibayan sa pagkakakilanlan ng lahat ng mamamayan at resident aliens kung saan magiging simple ang mga transaksiyon, pribado man o pampubliko.
Kokolektahin ang demographic at biometric information ng isang tao sa oras ng rehistrasyon. Ang demographic information ay ang mga nakikita sa ID. Ang biometric information ay mga “encoded
at stored” sa smart-chip na nakatanim sa card. Mababasa lamang ito at makikita ng mga ahensiyang pinapayagang may access sa kanila.
Para sa mga batang ang edad ay mas mababa sa lima ay demographic information at front-facing photograph lamang ang kokolektahin gaya ng pangalan, address, kasarian, kapanganakan, at blood type.
Ang mukha ng ID ay maglalaman din ng kakaibang digital number na panghabang-buhay na pagkakakilanlan ng isang tao. Non-transferable ito na tanging para lamang sa taong humahawak
nito.
Para naman sa iba, ang biometric information ay makukuha at maisisilid sa isang chip gaya ng fingerprint, iris scan at front facing photograph. Sinabi ni Alibuyog na ang National ID System Act ay ipinasa upang isulong ang maayos na paghahatid serbisyo ng gobyerno, kaginhawaan sa pagsasagawa ng negosyo, mahusay na
pamamahala at maiwasan ang korupsiyon.
Nilagdaan ni Pangulong Rodrigo R. Duterte ang pagsasabatas ng Philippine Identification System Act noong Agosto 6, 2018 na layong pagsama-samahin ang mga government IDs ng mga
mamamayan at mga banyagang residente sa bansa.

PNA/PMCJ/ABN