2 a mangngalap a taga-Ilocos Sur, naalaw iti tengnga’t taaw

November 3, 2018 Provincial

SAN FERNANDO CITY, LA UNION – Dua a mangngalap a taga-Ilocos Sur ti naalaw dagiti pahinante ti barko ti Intsek, MV Kyowa Hibiscus, iti tengnga’t taaw iti West Philippine Sea idi rabii ti Sabado, Oktubre 27.
Nabigbig dagiti dua a naalaw a mangngalap a da George Tapucol, 32 ken naasawaan; ken ni Warlito Reotiris, Jr., 21 ken baro; agpada nga agnaed iti Sitio Alangan, Magsingal, Ilocos Sur.
Agarup alas-dies iti rabii idi Oktubre 27, 2018 idi sumanglad dagiti dua a mangngalap iti Poro Point, San Fernando City, La Union kalpasan nga inyawat isuda dagiti pahinante ti MV Kyowa Hibiscus kadagiti nagresponde nga operatiba ti Philippine Coast Guard (PCG) nga indaulloan ni POI Michael C. Guray.
Segun kenni Tapucol, nagluasda kenni Reotiris a napan agkalap iti West Philippine Sea idi parbangon ti Oktubre 26; ngem idi agawiddan iti rabii ti Oktubre 27, nasabatda ti dadakkel a dalluyon a nangpattog ti demotor a bangkada.
Iti istoria ni Tapucol, apaman a napattog ti bangkada, ginalutanda dagiti kawayan a pasaplakna nga isu ti nagkaptanda agingga a nakita isuda dagiti pahinante ti barko dagiti Intsek.
“Nagasat kami la unay ngamin agkakapsut ken malamlammin kamin idi nakitada kami dagiti pahinante ti barko ti Intsek a nangalaw ken nangsalbar kadakami iti tengga’t taaw a nakabatog iti Vigan City,” kinuna ni Tapucol.
“Nakagin-awa kami idi adda tumulong kadakami; pinakandakami ken  inikkandakami a dagus ti medical attention dagiti pahinante ti barko a puro Filipino sakbay nga inyawatdakami kadagiti operatiba ti Philippine Coast Guard,” kinuna ni Tapucol.
“Nagyaman ken nasalun-at a nagawid dagiti dua mangngalap iti pagtaenganda kalpasan ti “debriefing” da iti bigat ti Domingo, Oktubre 28,” kinuna POI Guray. FREDDIE G. LAZARO, PIA Region 1 / ABN