Mga residente ng Itogon, inalok ng pangkabuhayan

November 3, 2018 Provincial

ITOGON, BENGUET – Nag-aalok ngayon ang iba’t ibang ahensiya ng gobyerno ng mapagkukunan ng pangkabuhayan sa mga residente ng Itogon na sanhi ng malaking landslide na kumitil sa buhay ng daang tao dito, karamihan ay mga small-scale miners.
Tulad ng National Food Authority (NFA) sa Benguet, na nanghihikayat sa mga residente, lalo na sa mga malalayong lugar ng bayang ito, na magbenta ng NFA rice, nang sa gayon ang mas mababang presyo ng government rice ay magiging accessible sa komunidad.
“They can open a ‘bigasang bayan’, or a community rice trading center, especially those who are in far-flung villages, so that they can sell the NFA rice,” ani NFA-Benguet Provincial Manager Cecilia Concubierta.
Hinimok ni Concubierta ang mga residente na magsumite ng kanilang proposal para sa pagbubukas ng bigasang bayan para sa assessment sa ginanap na Itogon Economic Forum na binuo ng Economic Sectoral Committee ng Cordillera Regional Development Council noong Oktubre 24.
Ang NFA ay kabilang sa mga ahensiyang pumunta para mag-alok ng long-term livelihood na makakatulong sa mga residente ng Itogon sa ginanap na economic forum, kung saan libong mga residente ang dumating upang mag-avail ng nasabing alok.
Nang araw na iyon, nabenta ang 100 sako ng NFA rice sa P27 bawat kilo. Bawat pamilya ay maaaring bumili ng hanggang limang kilo bawat isa.
Nag-alok din ang Technical Education and Skills Development Authority (TESDA) ng kanilang libreng skills training sa mga interesadong residente.
Ayon kay TESDA-Benguet provincial director Davic Bungallon na halos P2.5 milyon ang inilaan para sa skills training ng mga residente ng Itogon.
Aniya, nag-umpisa ang TESDA ng kanilang one-month training para sa shielded metal arc welding, electrical installation at maintenance, carpentry, at masonry sa Itogon Training Center sa Barangay Tuding. Ang ikalawang pangkat ay mag-uumpisa sa Nobyembre 26 na mayroong 25 participants bawat kurso.
Dagdag niya na ang customer service skills training na ipinatutupad ng Forest House Assessment and Training Center ay nagsimula sa Oktubre 10 na mayroong 60 participants.
Ani Bugallon, ang TESDA ay magsasangguni ng mga trainees sa mga partners at mga kumpanya para sa trabaho sa oras na makuha nila ang kanilang national certification na kaya nilang gawin ang mga trabahong nais nila.
Ang Department of Labor and Employment (DOLE) office sa Cordillera Administrative Region ay nagdaos din ng job fair sa ginanap na economic forum.
Ang forum information officer na si Patrick Rillorta ay nag-alok sa mga residente ng 3,970 job vacancies, kung saan 2,280 ay para sa overseas employment at 1,690 sa local employment.
May 12 na kompanya at tatlong manpower agencies ang nag-alok ng mga job vacancies; 54 ang hired-on-the-spot, kung saan 26 ang para sa local employment at 28 para sa overseas jobs.
Nagdala rin ang Department of Trade and Industry (DTI) ng Diskwento Caravan, kung saan ibinebenta ang mga basic goods ng mga local partner, Tiongsan Supermarket, at may lima hanggang 10 porsiyentong discount.
Nagtayo rin ang Department of Agriculture ng TienDA store at nagbigay ng selling areas para sa iba’t ibang ani.
Sinabi ni DTI-Cordillera regional director Myrna Pablo na ang pagdiriwang ay kasama sa utos ni Presidente Rodrigo Duterte sa mga ahensiya ng gobyerno na magtipon at pagsamahin ang kanilang kakayanan upang tulungan ang mga survivors ng Itogon.
“This is a result of the call from the President through Presidential Adviser (Francis) Tolentino for agencies with economic activities to be together and extend assistance,” ani Pablo. “We are getting a complete profile of the residents, which will be the basis for a long-term assistance program,” dagdag niya.
Naroon din sa nasabing pagtitipon ang Philippine Overseas Employment Agency, Mines and Geosciences Bureau, Social Security System, Employment Compensation Commission, Occupational Safety and Health Center, at ang Philippine Information Agency. L.AGOOT, PNA / ABN