2 Navy officers, 8 iba pa, kakasuhan sa namatay na 2 Vietnamese

October 14, 2017 Provincial

LINGAYEN, PANGASINAN – Inirekomenda ng Sub-Task Group on Investigation (STGI) na binuo ng Provincial Committee on Illegal Entrants (PCIE) ang pagsasampa ng kaso sa dalawang miyembro ng Philippine Navy (PN) at walong enlisted personnel na sangkot sa pagpapaputok ng warning shot na kumitil sa buhay ng dalawang Vietnamese na ilegal na nangingisda sa Cape Bolinao.
Nakita sa pagsisiyasat ng task force na may pagpapabaya sa bahagi ng mga operatiba ng Navy nang nagkaroon ng maling kalkulasyon sa pagpapaputok ng warning shots sa tumatakas na barkong Vietnamese kaya tinamaan ang dalawang mangingisda na noon ay nagtatago sa forward cargo compartment ng barko, umaga ng Setyembre 23, 2017.
Nakasaad din sa ulat ng task force na magsasampa ang PN ng kaso kontra sa limang kasama ng dalawang Vietnamese dahil sa ilegal na pangingisda sa exclusive economic zone na sakop ng Pilipinas.
Ayon kay Capt. Joseph Coyme ng Philippine Coast Guard na namumuno sa task force, ang rekomendasyon ay nabuo base sa kanilang natuklasan matapos ang masusing imbestigasyon.
Kabilang sa kanilang rekomendasyon ang agarang repatriation o pagpapauwi sa labi ng dalawang Vietnamese sa pamamagitan ng Department of Foreign Affairs (DFA) at ang pagbibigay ng kopya ng resulta ng imbestigasyon sa Vietnamese embassy, DFA, PN, at Bureau of Fisheries and Aquatic Resources (BFAR).
Pinasalamatan naman ni PCIE spokesperson at Pangasinan police provincial director Senior Supt. Ronald Lee ang mga miyembro ng STGI para sa “transparent, impartial and honest-to- goodness” na imbestigasyon sa insidente.
“It was a delicate case but it was handled the way it should be handled. All evidences and persons of interest were accessible. Sa processing of evidences lang medyo nagtagal but now, the result is here,” ani Lee.
Ipinaliwanag nito na iiendorso ng PCIE ang report at rekomendasyon ng task force sa Regional Committee on Illegal Entrants (RCIE).
Samantala, sinabi ni Lee na ang bangkay ng mga Vietnamese na sina Le Van Reo at Phan Van Liem ay dinala na sa Ninoy Aquino International Airport noong Oktubre 6 para sa kanilang flight, 10am ng parehong araw. Ang magkasanib na tauhan ng kapulisan, Navy, at Marines ang nagbigay ng seguridad at nag-escort habang inihahatid ang mga labi sa airport.
Ayon kay Lee ay iniulat ni Tran Dung Minh, kinatawan ng Vietnamese embassy at interpreter ng grupo, na ang mga labi ay matiwasay na naihatid sa kanilang pinagmulang bayan sa Tuy Hoa, Phu Yen sa Vietnam. VHS,PIA-Pangasinan / ABN