2,778 A MANNALON TI TABAKO TI ILOCOS TI MAKAAWAT ITI P16-M A TULONG ITI PRODUKSION

December 22, 2024 Provincial

LAOAG CITY

Nangrugin ti panagmula dagiti agmulmula iti tabako iti Ilocos Norte para iti 2024-2025 cropping season babaen ti
production aid a PhP6,000 para iti tunggal mannalon. Pinasingkedan ni Randy Abella, branch manager ti National Tobacco Administration (NTA) iti Ilocos Norte, idi Martes, kunana nga agdagup iti 2,778 a mannalon ti manamnama a mabenepisiaran iti production grant nga agdagup iti dandani PhP16.67 million. “Agingga ita, nakaiwaraskami iti PHP3.4 milion bayat ti ceremonial distribution idi napan a lawas.

Maysa pay nga iskediul ti maituding [iti uneg daytoy a bulan] manipud kadagiti nadumaduma a munisipyo a
mangpatpataud iti tabako agingga a makompletotayo ti pannakaiwaras ti naituding a badyet para iti Ilocos Norte,”
kinunana. Nairuar ti immuna a pondo iti Siudad ti Batac. Tinawen nga agiwarwaras ti NTA iti tulong iti produksion
kadagiti agmulmula iti tabako babaen ti proyekto a Tobacco Contract Growing System.

Ti tulong iti produksion, a maited iti porma ti kuarta ken material nga inputs, ket nasken iti pannakapataud ti kasapulan a kaadu ken kalidad ti tabako a kasapulan agpadpada dagiti lokal ken ganggannaet a merkado. Segun kadagiti farmer-recipient a da Zarex Galang ken George Rafael manipud Laoag City, nakatulong ti subsidyo ti
gobierno a mangkissay iti gastos iti produksion ken immadu ti matgedanda iti baet ti panagngato ti presio dagiti
agricultural inputs. “Dakkel a tulong ti production aid para kadakami tapno mapapigsa ti produktibidadmi,”
kinuna ni Galang iti interview idi Martes.

Malaksid iti tulong iti produksion manipud iti NTA, dagiti siudad ken munisipyo nga agmulmula iti tabako ket mangiwarwaras pay kadagiti agricultural inputs kas kadagiti water pumps nga addaan accessories, abono, ken
insektisidio kadagiti mannalon tapno maparegtada nga agmula iti ad-adu pay a tabako. Babaen ti bingayda manipud iti panagkolekta ti excise tax ti tabako, agtultuloy ti panangipaay dagiti local government units (LGUs) ditoy iti farm subsidy ken dadduma pay nga interventions kas panangbigbig iti kontribusion dagiti agmulmula iti tabako iti
ekonomia ti pagilian.

Iti sidong ti Republic Act Nos. 7171 (para iti Virginia) ken 8240 (para iti Burley ken Native), dagiti probinsia ken munisipalidad nga agmulmula iti tabako ket agkolekta ti bingayda manipud kadagiti koleksionda nga excise tax ti
tabako a naibatay iti kaadu ti bulong a patauden dagiti lokal nga agmulmula. Ti gobierno nasional ti makagun-od iti
kadakkelan a bingay manipud iti koleksionda nga excise tax tapno mapondoan ti universal health care program daytoy.

(LA-PNA Ilocos/PMCJr.-ABN)