4-day workweek scheme ti PGLU, inggana Hunio 2

April 22, 2017 Headlines

SIUDAD TI SAN FERNANDO – Babaen ti maysa a memorandum ni Gobernador Francisco Emmanuel “Pacoy” R. Ortega III idi Abril 6, 2017 ket inadaptar ti probinsial a gobierno ti La Union (PGLU) ti 4-day workweek scheme iti panangted ti serbisio kadagiti umili manipud Abril 17 inggana Hunio 2, 2017.
Ti Compressed Workweek Scheme manipud Lunes inggana Huebes, 7am inggana 6pm, ket pakaibilangan dagiti opisina ti administrative, financial, legislative, ken technical services bayat a dagiti mangmangted ti medical, rescue ken security services ket ituloyda ti regular schedule.
Gandat daytoy a kissayan ti operational expenses ken fossil fuel emissions babaen ti panangtiped ti kuryente kas sungbat iti ingangato ti electric demands ken price hikes kabayatan ti kalgaw wenno summer.
Manamnama pay a pangatuen daytoy ti pannakapnek iti trabaho ken kinaproduktibo dagiti empleado babaen ti panangited ti tallo-aldaw nga inana tapno makissayan ti stress ken maliklikan ti occupational burnout.
Tarigagay ti PGLU, iti panangidaulo ni Gobernador Pacoy, a mangted ti epektibo ken nabileg a panangituray iti gobierno ken mangipaay ti dekalidad a serbisio kadagiti umili. Darlene Acosta, PITO-LU / ABN