Iligal na droga tinalakay sa GABAY ni De Guzman

April 22, 2017 Headlines

BAUANG, LA UNION – Sa isinagawang buwanang dalaw ng mga opisyales sa bayan ng Bauang na isa sa proyekto ang Gobiernong Abot ang Barangay (GABAY) sa barangay Payocpoc, Norte-Weste noong ika-19 ng Abril 2017 ay tinipon nito ang mga residente para magsagawa ng medical-dental mission at physical therapy, blood typing ng Red Cross, mobile library para sa mga bata, libreng gupit at libreng tsinelas para sa mga bata.

Ang GABAY ay umiikot sa 39 na barangay ng bayan ng Bauang tuwing ikatlong Miyerkules ng bawat buwan upang makipagtalakayan sa bawat pamilya, residente at barangay officials ang mga opisyales ng bayan ng Bauang.

Sa pangunguna ni Mayor Eulogio Clarence Martin P. De Guzman III ay naunang ipinahayag ang mga alituntunin para sa kapayapaan at pag-unlad ng bawat mamamayan ng Bauang.

Sa panayam ng Amianan Balita Ngayon kay De Guzman, “Labis ang pasasalamat ko sa pakikipagkaisa ng aking mga kababayan sa kanilang pagsunod sa mga alituntunin at kampanya na pinairal ang war against illegal drugs. Pinatunayan ko ito sa harap ni Pangulong Rodrigo R. Duterte na susuportahan ko ang kanyang adbokasiya hanggang tuluyang maging drug free ang bayan ng Bauang, sa mga report mula sa kapulisan ay wala tayong naipabalita na mula sa ating lugar ang mga drug lord, pusher dahil karamihan sa mga nahuhuli ay mga dayuhan na nanunuluyan lamang dito sa aming lugar, na kung saan ay dito sila gumagawa ng kanilang maruming trabaho at nakakaimpluwensya pa sa aming mamamayan, naniniwala ako na hindi natin gawain ang mga ganitong masasamang katiwalian, kaya paulit-ulit kami lagi tinutuligsa at isinasagawa pa rin ang Oplan Tokhang. Hiniling ko rin kay Bauang OIC Chief of Police PC/INSP Joel P. Lagto na patuloy ang pagpapatrulya sa bawat barangay na kailangan ay tuluyan nang mawala ang illegal na droga sa ating bayan. At maging ang mga mamamayan ay sinabihan ko rin na makipagtulungan na bantayan ang bawat residente, pakilusin ang Masa Masid na ito ang isang magbibigay ng impormasyon sa kapulisan.”

“Kailangan walang maging hadlang sa ating pag-unlad, namumuhay kami nang marangal lakip ang tiwala at pananalig namin sa Panginoong Diyos na tanging pag-asa namin ay makatawid sa kasaganahan at kapayapaan,” ani De Guzman.

Pinangasiwaan rin ni OIC Chief of Police Joel Lagto ang pagtitipon sa pagtalakay ng Anti-Drug Abuse at Crime Scenes ng SOCO kasama ang Municipal Peace and Order Council at Municipal Anti-Drugs Abuse Council.

Inaasahan naman ni Payocpoc Punong Barangay Joel A. Caluza ang kanilang mga kahilingan na mabigyan ng pansin partikular sa pangkabuhayan, edukasyon sa mga bata at pangkalusugan na mabigyan ng proteksyon ang bawat sambahayan sa kanilang barangay na maipagkakaloob nang maayos ito sa kinauukulan. ABN