5 taon, hamon sa pagpapatupad ng RPRH law

August 13, 2017 Metro BLISTT

Nabigyan ng pansin ang Responsible Parenthood and Reproductive Health (RP-RH) Law na sa paglipas ng limang taon mula nang naisabatas ay hindi pa rin ganap na naipapatupad hanggang ngayon.

Nagsagawa ng talakayan sa lungsod ang mga kinatawan ng Philippine Legislators Committee on Population and Development (PLCPD) at ng ibang partners na pinangunahan nina PLCPD Executive Director Romeo Dongeto, Commission on Population–CAR Regional Director Rose Fortaleza, Benguet Health University Project Lead, Adivayan Youth Health Center Jude Tayaben at ang panauhin na si Benguet Governor Crescencio Pacalso noong Agosto 11, 2017.

Disyembre 2012 nang isinabatas ang RP-RH Law na panawagan sa pamahalaan ang apat na pangunahing probisyon: ipatupad ang age and development appropriate sexuality education; bigyan ng daan ang mga kabataan sa impormasyon at serbisyo sa reproductive health, kasama na ang family planning at HIV counseling at testing; siguraduhing may sapat na pondo para sa programa; at bigyan ng pagkakataon ang local government units na ipatupad ang batas sa pamamagitan ng pagsiguradong may kapasidad ang mga ito (sa larangan ng human resource, technical skills at pondo).

Subalit kapansin-pansin na laganap ang hamon sa RPRH law sa lahat ng sangay ng pamahalaan: sa tagapamahala, sa pambatasan at sa hudikatura at maging sa lahat ng antas ng pamahalaan, mula sa national hanggang sa lokal.

Sinabi ni Dongeto, “Inaasahan namin na sa darating na repasuhin at pagbabantay ng kongreso ang mga puwang at mga isyu sa parehong patakaran at pagpapatupad ay matutugunan ang mga hamon na ito at mapagtagumpayan.”

Dahil ngayong buwan ng Agosto ay pagdiriwang ng National Family Planning Month na nagsisilbi bilang isang paalala para sa mga tagasuporta ng RH upang manatiling matatag at para sa mga tungkulin na mamumuno upang magkasundo sa ganap at wastong pagpapatupad ng batas RPRH.

Ayon naman kay Fortaleza, “ayon sa Department of Health marami ang mga contraceptives na mawawala na ito yung ibang klaseng pills hanggang ngayong taon na lang so, ano ang implikasyon nito? Kung mawawalan na ng supply na pills ay hindi na gagamit, kung hindi mag-provide ang LGU o mag-purchase ng commodity ay hindi na sila gagamit. Right now sa Cordillera meron tayong 62,000 kababaihan na gustong magplano ng pamilya pero kung wala ng commodity na available sa ating mga RHU at hospital ay kawawa itong mga kababaihan.

“Kaya ang ginagawa natin ay tumutulong tayo together with DOH sa kampanya kasama ang PLCPD at ibang society organization na ma-impeach ang TRO, kaya bilang bahagi ng aming adbokasiya ay humihingi kami ng one million signature campaign para suporta maibigay sa Supreme Court na mai-lift yung TRO. So as of April, ang nakuha pa lang natin sa buong Pilipinas ay nasa 300,000. Inaasahan natin na magtagumpay tayo sa ating adbokasiya,” ani Fortaleza.

Buong suporta naman si Governor Pacalso para sa ikabubuti ng kababaihan sa Cordillera at sa mga nabibiktima ng rape ay kasama pa rin ito sa usaping responsible parenthood na kailangang mabigyan ng pansin at mapanatili ang proteksiyon lalo na sa mga menor de edad. ABN