58 infra projects tinapos ng DPWH sa Benguet

February 9, 2018 Latest News

LA TRINIDAD, Benguet – Iniulat ng Benguet First District Engineering Office (DEO) ng Department of Public Works and Highways sa Cordillera (DPWH-CAR) na may 58 infrastructure projects ang natapos ng kagawaran noong 2017 na nagkakahalaga ng P674.5 milyon.
Sinabi ni District Engineer David Buliyat na ang pondo ay mula sa 2017 regular infrastructure budget ng ahensiya.
Base sa 2017 accomplishment report, ang mga natapos na proyekto ay tourism roads, mga tulay, flood control, rainwater collection facilities, at multi-purpose buildings. Sakop ng Benguet First DEO ang limang bayan ng Itogon, Tuba, Bokod, Kabayan at La Trinidad.
Nakasaad sa ulat na ginawa, inayos at ni-rehabilitate ng ahensiya ang may 7.17 kilometrong daan na may halagang P168.711 milyon.
Kabilang dito ang Baguio-Bauang, Baguio-Bontoc at Shilan-Beckel roads.
May P6.5 milyon ang ginamit din sa replacement, maintenance, at rehabilitation ng mga tulay sa mga national roads.
Ang mga tulay na ito ay ang Ambayek bridge sa Gurel-Bokod-Kabayan-Buguias-Abatan road; Batuan bridge sa Asin-Nangalisan-San Pascual, Tuba Benguet-La Union boundary road; at Bongis bridge sa kahabaan ng Gurel-Bokod-Kabayan-Buguias-Abatan road.
Nasa P120.030 milyon ang ginamit upang makumpleto ang pitong flood control projects, kabilang ang repair at maintenance ng dikes, river walls at waterways.
Ang flood control projects ay sa Balili, La Trinidad; Bangao at Poblacion, Bokod; Chogong-Danas at Poblacion sa bayan ng Kabayan; at Twin Peaks sa bayan ng Tuba.
Natapos din ang farm-to-market roads, school buildings at day care centers na nagkakahalaga ng P38.4 milyon.
Ang mga ito ay sa Barangay Poblacion; Sitio Kabayasan-Tadimoymoy ng Barangay Adaoay; Beleng-Mawini-Balangabang ng Barangay Duacan; at Ekip-Apunan sa Kabayan Barrio, lahat ay nasa munisipalidad ng Kabayan.
Ang mga natapos na multi-purpose buildings ay sa Alapang, La Trinidad; Ambuklao (Ambuklao-Bokod), Bisal Proper, Bobok-Bisal at Nawal, lahat sa Bokod; Bagong, Banengbeng, at Bulluay sa Sablan; Camangan sa Itogon; at ang Rural Health Center sa Barangay Poblacion sa Tuba.
Natapos din ng ahensiya ang konstruksiyon ng Ballay-Tabio-Tonoman-Lusod road na papuntang tourism sites ng Bulalacao Lakes at Mt. Tabeo sa Kabayan.
Gayundin ang Guisset-Binga-Baloy-Baloy-Tinongdan road na papuntang Binga dam at Mt. Ugo na lugar ng International Sky Running sports event sa Itogon.
Natapos din ang 989 meters farm-to-market roads na nagkakahalaga ng P4 milyon, na pinondohan ng Department of Agriculture (DA) at Department of Agrarian Reform (DAR). ABN