7 akusado sa pagdukot at pagpatay, kulong ng 40 taon

January 10, 2019 Headlines

LUNGSOD NG BAGUIO – Makalipas ang 14 taon, nakamit ng pamilya ang hustisya sa pagdukot at pagpatay sa Filipino – Chinese businessman na si Senly Loy, matapos hatulan ng 40 taon na pagkabilanggo ( reclusion perpetua) ang pitong akusado, kabilang ang mastermind, sa sala ni Judge Maria Ligaya V. Itliong Rivera, ng Branch 60,Regional Trial Court, Baguio City.
Sa 29 pahinang desisyon ng nasabing korte na ipinalabas noong Disyembre 21, sentensyado ng reclusion perpertua without eligibility for parole sa kasong kidnapping for ransom with homicide ang mga suspek na sina Paul Sumbad, Reymond Dulaycan, Gastrol Sarol, Jason Ling-lingan, Roger Agtulao, Cromwell Filog at Danny Palapag.
Iniutos din ng korte sa mga akusado na magbayad sa mga pamilya ng biktima ng P800,680 bilang actual damages; P70,000 bilang civil indemnity; at
P200,000 bilang moral damages.
Si Loy ay kinidnap noong gabi ng Marso 18,2004 sa Dizon Subdivision, Baguio City at makalipas ang halos dalawang buwan noong Mayo 17,2004 ay natagpuan ng National Anti-Kidnapping Task Force operatives ang kanyang bangkay na natatabunan ng bato at sunog na gulong ng sasakyan sa
may Barangay Abiang, Atok, Benguet.
Napag-alaman na makalipas ang 41 araw nang kidnapin ang biktima, ang pamilya ng biktima ay nagbigay ng P500,000 sa mga kidnapper, mula sa P10 milyon ransom na sinasabing buhay ang negosyante habang isinasagawa ang negosasyon.
Dalawa pang akusado na sina Eddie Bagni at Jefferson Ab-aboy, ang hindi napabilang sa hatol na habambuhay, dahil sa kanilang pag-amin sa kanilang partisipasyon sa krimen at nag-silbing state witnesses. Ang kanilang mga testimonya ang naging basehan ng korte na maisulong ang kaso laban sa mga akusado.
Sina Bagni at Ab-aboy, na empleyado ni Sumbad ang sinasabing nag-plano para kidnapin ang biktima at sunugin ito.
Hindi rin kinatigan ng korte ang mga alibi ng mga suspek sa naganap na karumal-dumal na krimen, na sinasabing busy sila sa negosyo at ang iba ay wala sa lungsod nang maganap ang insidente.
Lumitaw sa medico-legal report na si Loy ay namatay sanhi ng intra-cranial bleeding secondary to traumatic injuries na tinamo nito, matapos iuntog ang kanyang ulo sa doorframe ng kanyang sasakyan nang manlaban ito sa mga kidnaper.
ZALDY COMANDA/ABN