Adda met la ngata naibati na a pagimbagan ti ASEAN Summit

April 29, 2017 Opinion Sirmata ken Tagtagainep ni Mang Gusting

Yahooo, yahoooo! Naimbag nga oras kadatayo amin kakailian… kumusta metten kadagiti batug yo a langit. Ania ngay ti pagimbagan tayo dita, sapay la koma ta napia kayo amin nga awan malabsan. No dakami met ti kas yo damagen okey kami laeng ditoy, ti laeng parikut ket dandani minalem nga agtodo ket saan pay met laeng a makuna a panagtotodo ta bulan pay laeng ti kalgaw. Ngem bunga daytoyen ti global warming ket agbanag ti panagbaliw ti klima wenno climate change a kunada. Dakkelen ti nagbalbaliwan nga agpayso ti panawen kailian ngem kadatayo a tattao awan pay lat nagbalbaliwanda. Adu latta pay ti rinuker ti utekna. Adu latta kadagiti nakatugaw nga opisyal ti antukab. Buaya a makuna kadagiti empliado kadagiti nagduduma pay nga ahensia ti gobierno. Sus maria santisima, bari-bari puwera an-annong a kuna ni Ama Seniong.

No koma ta iti panagbalbaliw ti panawen ket agbalbaliw metten dagiti rumbeng nga agbalbaliw ngem ti dakes na kailian, kasla nga awanen ti panagbalbaliw a makita kadagiti antukab nga adda iti turay ken adda takemna iti gobierno. Maysa kadagiti kalkalikaguman ti Presidente ket naan-anay a panagbalbaliw kasta met kadagiti ahensia ti gobierno ngem kangrunaan ti amin, mangrugi koma ti panagbalbaliw iti bagbagi tayo. Isu nga awan itan dagiti kundi sulpada kadagiti opisina ti gobierno ta no adda agreklamo, sus todas ni laing saanen nga agpangngadua ti panakakusayna iti puesto. Isu a kuwidaw kayo kailian a mangop-opisina kadagiti government agencies ken offices. Saanen a mabalin ita dagiti pumanaw lattan iti opisinada ket mapanda agukay-ukay, hahaha, adda aya kasta, Kayong Angkuan…unay met ta mapan agukay-ukayen bayat ti office hour. Kasta met dagita kundi sango iti computerda ngem gayam madama ti facebook wenno aggi-games da. Sus ina aya, unay met ti kastan.

Nalpasen ti makuna nga ASEAN Summit 2017 ket ditoy pay Pilipinas ti venue. Kunada a maipapan iti pannakapapigsa ti ekonomia dagiti sakupen daytoy wenno asosasyon dagiti pagilian iti abagatan a daya wenno Southeast Asia. Iti met biang ti Pilipinas ket isu ti parikut maipapan kadagiti isla iti South China Sea a kunada a no sadino ket pagi-innagawan dagiti adu a pagilian. Ngem no panunoten, sakupen ti Pilipinas ti kaaduan nga isla ngem saan nga ipalubos ti Tsina.

Ti pakadanagan tayo, Kayong Angkuan ket isu ti mabalin a mapasamak a ginnubat no bilang ta saan a masolbar daytoy a conflict a kunada. Pudno a no panunoten ken aklonen tayo koma a ditay kabaelan a kalabanen ti Tsina. Ngem adda met ketdi dagiti dadakkel a pagilian a naayat a tumulong iti Pilipinas no kas pagarigan ngem, sus Kayong Angkuan, adda met la ngata naibati a pagsayaatan ti Pilipinas iti naangay nga ASEAN Summit, Kayong Angkuan, ikit Juana? Ala, mangnamnama tayo nga adda ta no awan, sus maria kusina, awan latta ngaruden pagbaliwan ti biag ni Juan dela Cruz a kunada, isu la nga isu!
Alla, naimasanta manen ti naginnistorya, kayong, mapanak pay ta ne narigaten amangan no ag-HB manen ni Sofing ket umaynakto man suroten iti binalsig. Narigat ti madungiran ti lulonanna abusta nagpasugnoden dagiti nabatbati a buok ta ag-split ends payen, hahaha…. Kasta pay, babayooo, tsuptsup muahmuah.