AFP, PNP naka-full alert kontra NPA sa Cordillera

January 9, 2019 Headlines

LUNGSOD NG BAGUIO – Siniguro ng Armed Forces of the Philippines (AFP) at ng Philippine National Police (PNP) sa rehiyon ang kaligtasan ng mga residente at turista mula sa pananakot ng mga miyembro ng Communist New People Army Terrorists (CNT), lalo na ngayong panahon ng Kapaskuhan.
Ito ang ipinangako ng komander ng 503rd Infantry Brigade (IB) at ng director ng regional police sa hiwalay na interview.
“Alert na ang mga sundalo in coordination with the PNP, LGU (local government unit) katulungan din natin sila para maipatupad ang peace and order na mandato natin,” ani 503rd IB acting commander Colonel Henry Doyaoen habang ginaganap ang 4th quarter joint meeting ng Cordillera Regional Development Council (RDC) at ng Peace and Order Council (POC) sa Mansion House noong Miyerkules (Disyembre 19).
Dagdag pa nito na nakikipagtulungan din ang mga tagapagpatupad ng batas sa Department of Tourism (DOT).
“Kasama din natin ang DOT, ine-ensure natin na magiging kaaya-aya ang pagbisita nila [tourists] lalo na ngayong pasko and hopefully ma-prevent natin yung kung meron man silang iniisip na gagawin katulad sa ibang lugar, sana hindi mangyari dito sa ating lugar, unahan natin sila na ma-prevent yun,” aniya.
Hinimok ni Doyaoen ang publiko, mga barangay officials, at ang lahat sa komunidad na maging mapagmasid at iulat ang anumang posibleng banta sa kapayapaan ng kanilang mga lugar.
“We call on the other agencies, the public, to provide us with information, which will help prevent criminal activities from being perpetrated by the terrorists,” aniya.
Ang Police Regional Office-Cordillera (PROCOR) ay nasa “heightened alert” at magpapatuloy ang pagiging “full alert” mula sa Disyembre 24 hanggang Enero 1,2019.
Kinumbinsi ni Chief Supt. Rolando Nana ang mga residente na huwag papasukin sa kanilang tahanan ang sinumang kasapi ng NPA at maging sa komunidad.
Nakiusap din ito sa NPA na huwag manggulo sa mga komunidad na makakaapekto sa mga sibilyan.
Iniulat naman ni Dayaoen na mula Oktubre 1 hanggang Disyembre 14 ngayong taon ay walang karahasang may kaugnayan sa NPA ang naitala. “We hope wala sanang mangyari,” aniya.
Sa halip, aniya, ilang myembro ng NPA ang boluntaryong sumuko.
Nabigyan ang mga ito ng tulong mula sa gobyerno sa pamamagitan ng Enhanced Comprehensive Local Integration Program (E-CLIP).
Ang E-CLIP ay isang inter-agency collaboration na nagbibigay-tulong sa mga surrenderers gaya ng pagkakaloob ng livelihood training at ladderized education system upang makapagtapos ng pag-aaral ang mga mas nakababata.
Nabanggit naman ni Nana ang Executive Order 17 ng Presidente Rodrigo Duterte na nagsasad ng “a whole of government approach to end insurgency.”
Aniya, lahat ng mga probinsya sa Cordillera aay nagtatatag ng half-way houses kung saan makakapagsimula ng panibagong buhay ang mga surrenderers.
“Our surrenderers laid down their arms because they hear of the government’s programs and the sincerity of President Duterte to end the insurgency and have peace and development in the country,” ani Nana.
L.AGOOT, PNA/ABN