Agtultuloy a nabileg a serbisio, inkari ti LU

April 8, 2017 Headlines

SIUDAD TI SAN FERNANDO, LA UNION – Tapno maasa pay ti abilidad dagiti 20 local government units ti La Union a mangted ti nabileg ken nasayaat a serbisio kadagiti umili, inganuat manen ti gobierno probinsial ti tallo-aldaw a boot camp.
Idi Biernes, 60 empleado manipud iti 20 local governments ti probinsia ti nakalpas iti mini boot camp sadiay Agora Events Center, Thunderbird Resorts and Hotel, ditoy a siudad.
Ti nakuna a boot camp ket addaan tema a “Hearts Beating as One for the Love of La Union”. Gandat daytoy a mapabileg pay ti kapasidad ti LGUs a mangipatungpal kadagiti epektibo a governance mechanisms a mangsuporta ken mangpasayaat ti serbisio publiko kadagiti masakupanda.
Dagiti planning, agriculture, ken tourism focal persons dagiti LGUs ti target participants tapno maikkan dagitoy ti pannakaammo iti strategy management a kasapulan tapno masustenar ti agri-tourism programs kadagiti masakupanda a munisipalidad.
Inadal dagiti delegado ti kinapateg ti local economic development, nagduduma a wayat ti panangipatungpal kadagiti programa ken ti importansia ti agri-tourism tapno matungpal ti arapaap ti probisia nga agbalin a “Heart of Agri-Tourism in Northern Luzon by 2025”.
“I am very grateful that our municipality was given the opportunity to be a component in the achievement of the vision. We will be moving forward together in our journey of helping our constituents to be self-sufficient and to have a good quality of life,” kinuna ni OIC-municipal administrator ken accountant Joy P. Flores manipud Naguilian.
Iti nakuna nga aktibidad, binukel ti lima a grupo dagiti delegado ti bukodda a Trailblazer Project a mabalin a maipatungpal iti las-ud tallo bulan ken mangitandudo kadagiti bukodda a produkto iti agri-tourism.
Dagiti nagserbi kas resource speakers ken facilitators ket eksperto iti strategy management, directors ken advocates manipud Institute of Solidarity in Asia (ISA), initiative team champions, consultants ken multi-sectoral governance council members ti gobierno probinsial. AHFF, PIA-R1 / ABN