Ano ba talaga ang plano sa Kennon Road?

April 22, 2017 Editorial

Mismong araw ng Huwebes Santo, Abril 13, 2017, ay isa na namang aksidente sa Kennon Road ang nangyari. Isang pampasaherong van ang nahulugan ng malalaking tipak ng bato mula sa guho na sanhi ng biglaang pag-ulan ng malakas. Labing-apat na sakay nito ang nasaktan at isa ang minalas na namatay na napitpit sa bandang unahan ng sasakyan.
Kapansin-pansin dito na sa panahaon pa ng tag-araw nangyari ang pagguho at nagkataon pang daraan ang van na ito at siya pa ang natabunan. Matatawag nga natin itong disgrasya sa maling pagkakataon – wala nga namang pinipiling panahon ang sakuna at disgrasya.
Ang nasawi ay isang estudyante na puno ng pangarap at sa isang iglap ay bigla itong naglaho na laking hinanakit at pagdaramdam ng mga magulang. Ilan na nga ba ang naging biktima ng mga aksidente at pagguho ng lupa at bato sa Kennon Road mula pa noong ginawa ito? Mayroon bang dapat sisihin sa bawat aksidente at pagguhong nagaganap?
Napakamakasaysayan ang Kennon Road at isa itong popular na “landmark” sa Pilipinas dahil sa kakaibang anyo nito subalit isa naman sa pinakamapanganib na daan. Ilang daang milyon o baka bilyong piso na ba ang ginastos upang maisaayos ang liko-likong daang ito? Paunti-unti ang ginagawang pagsasa-ayos dito at ang pinagtutuunan ay ang konkretong lansangan lamang. Paano ang mga napakahabang talampas na dinaraanan ng 41.2 kilometrong hi-way? Bakit hindi ito nabibigyan ng pansin ng mga ahensiyang kinauukulan? Sino ba ang dapat tumingin ng mga kalagayan ng mga lupa o mga bato-batong bundok na ito? Hindi ba’t mas mainam na kapag inayos ang daan ay tingnan na rin ang kondisyon ng mga talampas at gilid ng bundok na tinatahak ng Kennon Road?
Totoong maraming ahensiya ang sumasakop dito at sa DPWH ay kani-kaniyang distrito at rehiyon ang sakop nila, gayundin marahil ang DENR (dahil hindi na sakop ng DPWH ang mga bundok?) Ang mga aksidente ng mga sasakyan sa lansangan ay maaari nating matukoy kung sino ang may kasalanan subalit kung ang pagguho ng mga lupa at bato ay kanino kaya natin maibabaling ang sisi?
Ang Kennon Road ang pinakamaikli at pinakamadaling ruta maliban pa sa marami pa rin ang may gustong dumaan dito patungo sa Manila at pabalik. Ang planong ididikit ito sa Tarlac-La Union-Pangasinan Expressway (TPLEx) ay maganda kung ang kabuuang pag-rehabilitate dito kasama ang mga talampas, bundok ay isaalang-alang, marahil maiiwasan din ang magiging biktima ng mga aksidente at sakuna.
Huwag na sanang madagdagan pa ang mga naging biktima at kung ang pagkaudlot sa rehabilitasyon ng Kennon Road ay ang mga oposisyon ng mga residente doon at ilang sumasakay sa isyu ay kinakailangan na dito ang matinding “political will”. Pmcjr.