Asino kadi a talaga ti maikari?

Opinion Sirmata ken Tagtagainep ni Mang Gusting

Naimbag nga agsapa, aldaw, malem wenno rabii kadakayo amin kabarangayan, kakayong, gagayyem ken saan nga amammo.

Sumangbay manen kadagiti nadayaw a matmata yo toy kolum tayo ket sapay la koma ta naikkaten dagiti sangkap kadagiti mulagat yo.

Kumusta kayo metten Kakayong? Kumusta kayon, kakayong, kakaarruba nangruna kenka Kayong Angkuan? Nadanundaka met laengen nga immay dinakulap dagiti kandidato, national man wenno local candidate?

Adda kadin nangyawat kenka iti ninoy wenno tallo’t taona a papel de bangko? Sus, awanen, a. Inatiwnakan ni Ikko ta amin sa nga immasideg kenkuana a kandidato a nangyawat iti polietos nga adda a naipapit a papel de banko ket inawatna.

Ti rasonna, kinusitda met la kanu wenno naggapu kadagiti drug lord, gambling lord ken aminen a kita ti dakes a lord a kuna ni simpor.

Ta kunana, saan kanu a maymaysa ti lord itan ta addan dagita gambling lord, drug lord, carnapping lord ken ania pay dita.

Iti lugarmi, immuna a kinitak dagiti puon ti kayo, poste ti koriente no adda nagisab-it wenno nagikabil iti poster na a kandidato kadagitoy a lugar ngem, awan nakitak.

Saan met ketdi a direkta kunak manen a dagiti mismo a kandidato ti agikabil wenno agisab-it ngem ketdi, dagiti supporter da, kas intay nakuna, bilinenda koma a nasayaat.

Segun iti kaudian a damag wenno impormasion a naipalapayag kadatayo, adda dagiti sumagmamanu a barangay ken posters ti kandidato ti inikkat wenno binaklas dagiti maseknan ta dida nagtungpal kadagiti alagaden.

Koma, dayta ti pagpampanunotan dagiti tao da ken dadduma a kandidato a bilinenda a husto dagiti tao da. Kadagitoy a tiempo ti basingkawel, masapul nga agbalin tayo a nasikap.

Tay kunada, senyalan a naimbag no manok a para bulang. Asino kadi a talaga dagiti maikari nga agbalin a lider tayo?

Ania kadi a talaga dagiti kalidad wenno kabaelan ti maysa a kandidato tapno isu’t maikari nga intay botosan? Nga isu’t pilien tayo nga uray awan ti makuna a makinaria na wenno umdas a kuartana a paggatangna iti botos?

Umadanin kakayong. Makabulan laengen intay manen pilien dagiti agbalin a lider tayo. Koma, saan tayo nga agbiddut.

Saan a gapu ta inikkan dakayon iti manu perso a noodles, lata ti sardinas wenno maysa a kilo ti karne’t baboy, wenno nangted iti kuatro kantos, isu metten ti ibotos yo.

Sus, kakayong, kakaarruba, dikay koma agbiddut ta ti intay panagbiddut, kaipapanan ti intay panagtuok iti tallo a tawen a panagtugawda.

Ne, sakbay man nga intay gibusan daytoy kolum tayo, awan kadi’t nadlaw yo kaaaruba? Dandani metten minalem nga agtodo wenno agarbis ditoy siudad dagiti saleng.

Apay ngatan a kastoy ti tiempona? Awan met bagyo na iti sabali a lugar, ngem nakaskasdaaw ti kastoy a mapaspasaranmi ita ditoy siudad dagiti saleng.

Mabayag pay la ti semana santa a kunada ngem agtodo-todon. No nalpas koman ti semana, isu talaga nga agtodon. Intay mapasaranen ti kunada nga umuna a todo iti bulan ti Mayo.

Ala, sapay la koma ta saan to nga agtodo no aldaw ti election ta no kasta ti mapasamak, ay adu manen ti masadut a rumuar tapno agbotos.

Ala, good luck kadagiti kandidato ken good luck met kadatayo a botante. Koma, no asino a talaga ti maikari, isu koma ti intay ibotos.

Ala, kakayong, kasta pay ta naimasan tayo manen. Babayooo, tsuptsup, muahmuahh