Away ng Tatay at Nanay, sino ang apektado?

Binulaga ang mga tao lalo na ang mga residente ng lungsod ng Baguio sa sumambulat na palitan ng mga maiinit na salita sa pagitan nina Baguio Mayor Benjamin Magalong at Baguio Councilor Mylen Yaranon, sa Social Media na Facebook at mismo sa flag raising ceremony ng lungsod, gayundin sa mga panayam.
Nag-ugat ang bangayan ng dalawa sa isang post ni Councilor Yaranon sa kaniyang Facebook page kung saan nagbigay siya ng opiniyon tungkol sa nakaambang development plan sa BIBAK compound na dating nagsilbing dormitorio ng mga estudyante ng Cordillera na galing pa sa malalayong lugar na walang matirhan sa lungsod.
Naging makasaysayan at di-malilimutang dako ng maraming estudyante na karamihan sa kanila ay mga propesyunal na at tagumpay na sa kani-kanilang larangan. Sa post ni Councilor Yaranon ay nagbuhos siya ng kaniyang pagkadismaya dahil sa ipinipilit na development sa lugar ay tila nalimutan na ang tunay na layunin ng makasaysayang lugar na tahasang sinabi niyang inuuna pa ng kasalukuyang administrasyon ng lungsod ang kapakanan ng mga sasakyan (na ng mga may-ari ay mayayaman) kaysa sa mga estudyante at kabataan na tila hindi tugma sa adbokasya ng “Angat Buhay” na proyekto ni dating VP Leni kung saan masugid na miyembro si Yaranon.
Hindi nagustuhan ni Mayor Magalong ang pahayag na ito ng konsehala at nagbitaw din siya ng pananalita sa mismong flag ceremony ng lungsod nitong Lunes at ibinulalas sa publiko ang kaniyang galit at sinabing ang aga-aga pa lang daw ay namumulitika na si Councilor Yaranon at idinagdag pa na bakit ang kinuha ng konsehalang mga arkitekto sa development plan ng city market ay humihingi ng 10 porsiyento ng kabuuang halaga ng proyekto na ayon sa mayor ay aabot ito sa 100 milyong piso pataas depende sa huling magiging halaga ng proyekto.
Dahil dito ay tinawag ni Councilor Yaranon si Mayor Magalong na isang bully at pikon, dahil ang kaniyang ipinost sa social media ay kaniya lamang opiniyon at wala siyang nakikitang masama o mali dito.
Sa una pa lamang ay mahigpit na ang pagtutol ni Yaranon sa development ng city market lalo na kung ito ay isasapribado at mga higanteng kompanya ang hahawak at makikinabang, samantalang ang market development ay isang pangunahing proyekto ni Magalong at masidhi niya itong isinulong at nagbitaw pa ito ng salita noong kampanya na sa loob ng taong ito ay maisasakatuparan na ito.
Ang mga halal na opsiyal ng ating lipunan gaya ng mga mayor at konsehal ay itinuturing na mga ama at ina ng ating bayan o siyudad. Gaya ng sa isang tunay na tahanan, ang mga magulang, ang ama at ina ay dapat kakitaan ng mabubuti at wastong paggalaw, pananalita at pag-uugali upang maging epektibo at makabuluhang huwaran ng mga anak lalo na ang nais na respeto.
Sabi nga ng matandang kasabihan, kung ano ang nakikita at naririnig ng mga bata sa mga magulang ay ito rin ang kanilang maaaring gagawin sa kalaunan.
May mga punto sina Mayor magalong at Councilor Yaranon, subalit tila nakalimot sila na sila’y pawang mga halal ng tao na malaki ang respeto at inaasahan sa kanila at dapat kakitaan ng pinong asal at pananalita. Sabagay, sa mundo ng pulitika at makabagong panahon kung saan damit ang social media at isinisigaw na kalayaan sa pagpapahayag ay tao din sila.
Ngunit huwag sana itong maging dahilan na makalimot sila na sila rin ay ama at ina ng mga mamamayan ng lungsod na inaasahang gagabay sa pag-unlad ng lungsod. Kung patuloy ang bangayan na ito ay lalong mag-iisip ang taong-bayan at di-malayong magduda sa integridad na walang naitatagong mga lihim ang mga proyekto sa lungsod.
Anuman ang hindi nila pagkakaunawaan ay maaari naman nila itong pag-usapan sa ganang sarili nila o kaya’y sa isang espesyal na sesyon ng executive at legislative meeting kung saan malaya silang pag-usapan ito at huwag sa harap ng mga anak na kanilang nasasakupan – gaya ng ginagawa ng mga respetado at kapikapitagan na mga opisyal.

Amianan Balita Ngayon