Baboy ken frozen nga karne maiparit sumrek idiay Ilocos Sur

Headlines

SIUDAD TI VIGAN, Ilocos Sur – Tapno maisalbar iti industria ti baboy ti Ilocos Sur manipud iti makapapatay nga African Swine Fever (ASF), itultuloy iti gobierno ti probinsia iti temporario a pannakaiparit iti iseserrek dagiti sibibiag nga baboy ken frozen hog meats manipud saba-sabali a probinsia sadiay probinsia.

Daytoy ket babaen iti Executive Order (EO) No. 24, series of 2019 nga inruar ken pinirmaan ni Governor Ryan Luis Singson idi Agosto 22 kas resulta iti aprubado nga Provincial Resolution No. 0052, series of 2019 nga pinutar ni Board Member Efren Rafanan Sr. ken Vice Governor Jeremias Singson idi Agosto 20, 2019.

Daytoy nga resolusion ket resulta dagiti taripnong iti amin a sector nga karaman iti industria ti baboy kasta met dagiti hog raisers, meat vendors, veterinarians, government agriculture officers, slaughterhouse masters, meat inspectors, iti umuna a tallo nga lawas iti Agosto.

Iti maysa nga opisyal nga pakaammo ni Agriculture Secretary William Dar, kinuna na nga idi Agosto 16 nga nakaawat iti opisina na iti incident report manipud Bureau of Animal Industry (BAI) nga immado iti matmatay nga baboy nga tartaraknen dagiti mannalon kadagiti arubayan da. Mayanatup iti EO No. 24, adda dagiti report iti posible nga kaso ti ASF ditoy pagilian nga ginasut nga baboy iti apektado sadiay Central Luzon.

Alarmado iti gobierno ti probinsia gapu ta kaaduan nga suplay iti karne iti probinsia ket agtaud manipud kadagitoy nga lugar.

Isu nga nasken nga maaramid iti kanayon nga konsultasion kadagiti maseknan a sektor, ken temporario nga iparit iti iseserrek dagiti sibibiag a baboy ken frozen hog meat sadiay probinsia.

“As a safety net, if the supply begins to dwindle, or there is an increase of price of meat products, the local government unit (LGU) may suspend the ban of entry of live pigs as long as these are examined, inspected and certified to be safe for public consumption,” kuna ni Rafanan.

Kanayonan na, kinuna na nga iti kanayon ken agtultuloy nga konsultasion kadagiti stakeholders nga paliiwen iti sitwasion ket mangtignay iti LGU nga mangaramid iti aksion tapno masungbatan ti aniaman a sitwasion.

Daytoy a wagas nga mangsaluad iti industria ti baboy iti probinsia ket isu’t sungbat ti LGU iti awag ti Department of Agriculture Secretary William Dar nga mangipataw iti naing-inget a quarantine measures iti sapasap pagilian.

Kinuna na ni Rafanan nga iti LGU – Sto. Domingo Mayor Floro Tadena ket nangipatulod iti maysa nga memorandum kadagiti amin nga hog raisers, meat vendors, meat traiders, punong barangay, ken miembro ti PNP iti ili ti Sto. Domingo kas panagtulnog iti sinao ni Secretary Dar panggep iti ririmsua ti ASF iti dadduma a probinsia iti pagilian.

Indagadag met ni Rafanan kadagiti local media nga ireport ti aniaman nga pananglabsing iti Executive Order ken tumulong nga mangipalagip iti publiko iti peggad ti ASF ken dadduma pay nga sakit dagiti animal.

 

PIA-IS/PMCJr.-ABN